Самарқанд вилояти Пайариқ туманида фаолият юритувчи фермерга 12 сутка маъмурий қамоқ жазоси тайинланди. Бу ҳақда Самарқанд вилоят судлари хабар берди.
Маъмурий иш ҳужжатларига кўра, “Муҳаммад-Ойбек” фермер хўжалиги раиси 54 ёшли Ойбек Тувалов 2023 йил декабрь ойининг охирида Telegram орқали “Пайариқ туман фермерлари” номли гуруҳга “Пайариқ Кластер” МЧЖнинг фаолиятидан норози бўлиб хабарлар юборган.
Жумладан, у МЧЖ олдида жанжал бўлишини айтиб, йиғилишлар ва намойишлар уюштириш ва ўтказиш тартибига қарши хабарлар, видеохабарлар жўнатган. Шунингдек, Тувалов фермерлар ва ишчиларни йиғиб, маст ҳолатда АТБ “Агробанк” Пайариқ туман филиали биносида намойиш уюштирган.
Қайд этилишича, Жиноят ишлари бўйича Пайариқ туман судининг 4 январдаги қарорига мувофиқ О.Тувалов Маъмурий жавобгарлик тўғрисидаги кодекснинг 201-моддаси (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) 1-қисмида назарда тутилган ҳуқуқбузарликни содир этган деб топилган. Унга 12 сутка маъмурий қамоқ жазоси тайинланган.
Эслатиб ўтамиз, 2023 йил июнда Қарши туманида 37 гектар майдондаги тайёр ғалла ўрилмай, увол бўлаётгани тўғрисида хабар берилганди.
Изоҳ (0)