Тошкент ва Жиззах вилоятларида табиий газдан ноқонуний фойдаланиш ҳолатлари аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Жиззах шаҳар бўлими томонидан “Жиззахшаҳаргаз” газ таъминоти бўлими ходимлари билан ҳамкорликда терговга қадар текширув ўтказилган. Текширув давомида “Л.С.” МЧЖ масъул шахслари корхона ишлаб чиқариш цехи табиий газ тармоғидан узилган бўлса-да, тижорат мақсадида ўзбошимчалик билан тармоққа қайта уланиб, жами 857,2 миллион сўмлик табиий газдан ноқонуний фойдалангани аниқланган.
Шу каби, департаментнинг Зангиота туман бўлими томонидан туман газ таъминоти бўлими ходимлари билан ҳамкорликда ўтказилган терговга қадар текширувларда фуқаролар А.Э. ва А.Н. “О.Т.” МФЙдаги рақамсиз уйдаги балиқхонани ҳамда “Х.” МФЙ ҳудудидаги иссиқхонани тижорат мақсадида умумий фойдаланишдаги табиий газ тармоғига ўғрилик йўли билан улаб, жами 111,4 миллион сўмлик табиий газдан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Бундан аввал Андижон, Сурхондарё вилоятлари ва Қорақалпоғистондаги метан заправкалар фаолиятига чеклов ўрнатилганди. Биринчи навбатда аҳоли, шифохона, мактаб ҳамда мактабгача таълим ташкилоти каби аҳамиятга эга муассасаларнинг табиий газ таъминоти барқарорлигини таъминлаш мақсад қилинган. 12 декабрдан газ заправкаларнинг иш вақтига ўзгартиришлар киритилиб, соат 06:00 дан 12:00 гача этиб белгиланди.
Изоҳ (0)