Qarshi tumanida 37 gektar maydondagi tayyor g‘alla o‘rilmay, uvol bo‘lmoqda. Hokimlik fermerlarni, OAVni ayblash bilan ovora

Qashqadaryo viloyatining Qarshi tumanida 37 gektar maydondagi tayyor g‘alla o‘rilmay, uvol qilinmoqda. Fermerlar chaqiruvi bilan hududga borgan kombaynlar tuman hokimi topshirig‘iga ko‘ra, ortga qaytarilayotgani, fermerlarga esa yaroqsiz, g‘allani uvol qiluvchi kombaynlar yuborilayotgani xabar qilingandi.

“Daryo” mazkur holatga to‘xtalib, tuman hokimi qahriga uchragani aytilayotgan ikkita — “SHDS zamin ravnaqi” va “Parizoda Ro‘ziqulova” fermer xo‘jaligiga qarashli 37 gektar maydondagi g‘alla o‘rib olinmagani, bu g‘allani o‘rishga kirishgan kombaynlarga hokim taqiqi qo‘yilganini ochiqlagandi. Mazkur holat bo‘yicha munosabat bergan hokimlik fermerlar iddaosini rad etib, hududda haqiqatdan ham shu ikki fermerga qarashli g‘alla o‘rilmay qolganini tan olgandi.

“Bu masalada hech qanday muammo yo‘q. Fermerlarga bunday taqiq qo‘yilmagan. Charog‘il hududidagi mavjud 54 ta fermerning g‘alla maydoni navbati bilan o‘rilmoqda. Shu kecha kunduzgacha 50 ta fermer g‘allasi o‘rilgan bo‘lsa, kecha kechasi qolgan to‘rtta fermerlardan birining g‘allasi o‘rilgan. Ayni paytda esa (12 iyun kuni, soat 15:30 lar atrofi — tahr.) o‘sha to‘rtta fermer xo‘jaligidan yana birining dalasi o‘rilmoqda. Sizga shikoyat qilgan ikkita fermer xo‘jaligining g‘allasi esa bugun kechki payt o‘rib olinadi, — degandi hokimlik axborot xizmati rahbari To‘lqin Turdiyev.

Fermerlarning bugun yana tahririyatga takroriy murojaat qilishiga qaraganda hokimlik vaʼdasining ustidan chiqmagan.

Kecha bu holat bo‘yicha Siz surishtira boshlaganingizdan so‘ng, kechki payt dalamizga g‘allani o‘rsa, uvol qilib o‘radigan eski kombaynlardan ikkitasini olib kelishdi. Shaxsan men atrofimdagi fermerlar g‘allasini o‘rgan, g‘allani o‘rayotganda uvol qilmaydigan, yaxshi kombayn so‘radim. Shu sabab eski kombaynlar xizmatidan foydalanishni rad etdim. Buni kecha o‘sha paytning o‘zida Siz orqali jamoatchilikka ham maʼlum qilgandik. Hokimlik bugun kombaynlar yuborilgandi, fermer yerini o‘rdirishni istamadi deya bizni ayblashga o‘tibdi. Men ham tayyor g‘allam uvol bo‘lmay o‘rilishidan manfaatdorman-ku, nega tayyor kombayn g‘allamni uvol qilmay, toza o‘rsa, uni rad etayin? Mantiq qani bu yerda?, — deydi g‘allasi uvol bo‘layotgan fermer Bekzod Farmonov.

Fermerning aytishicha, ayni paytda ham g‘allasi o‘rilmay, shu holatda turibdi.

2023-yil davlatimizning g‘alla xirmoniga hissa qo‘shish uchun 20 gektar yerga g‘alla ekkanman. ‘Qarshi agro don’ bilan shartnoma qilingan bo‘lishiga qaramasdan hech qanday urug‘ va dori berilmasa-da, g‘allani o‘z vaqtida ekdim, sug‘ordim va doriladim. Maqsad yaxshi hosil olish edi. Aybim, paxta yetishtirishda tumandagi klaster bilan emas, viloyat miqyosida faoliyat yurituvchi klaster bilan shartnoma qilib qo‘yganim bo‘lyapti. Bu hokimga yoqmagani uchun tazyiqqa uchrab kelyapmiz, — deydi g‘allasi uvol bo‘layotgan fermer.

Bekzod Farmonovning aytishicha, Qarshi tumanida ularning g‘allasidan boshqa o‘rilmagan g‘alla maydoni qolmagan.

Nafaqat Charog‘il hududida, Qarshi tumanida o‘rilmagan g‘alla qolmadi. Lekin men va yonimdagi fermer xo‘jaligi boshqa paxtachilik klasteri bilan hamkorlik qilganimiz uchun hokimning qora ro‘yxatiga tushganmiz. Va g‘allamiz o‘rilmay, uvol qilinmoqda. Ayni paytda g‘allamizni o‘t bosib ketdi. Doni to‘kilib ketmoqda. Tuman hokimi bizning yerimizga kelgan kombaynlarni haydab yubordi. Buni olib chiqishdan maqsad g‘allamizning uvol bo‘lishidan qiynalyapmiz. Shu sabab hukumatimiz rahbarlaridan, tegishli tashkilot rahbarlaridan yordam so‘raymiz, — deydi fermer Bekzod Farmonov.

Qarshi tumani hokimligi fermerlar muammosiga eʼtibor qaratar ekan, “Daryo”da eʼlon qilingan maqoladagi holat haqiqatga to‘g‘ri kelmasligini bildirgan.

Aslida 3-otryad rahbari boshchiligida 11-iyun kuni soat 20:10 larda ‘SHDS zamin ravnaqi’ fermer xo‘jaligi dala maydoniga ikki dona yuqori unumli ‘CLASS-260’ va bir dona ‘CASE-4088’ kombaynlari o‘rimga tushgan. O‘rim jarayonida fermer xo‘jaligi rahbari g‘alla maydonlariga nam tushganligini ro‘kach qilib, soat 23:22 da o‘rimni to‘xtatgan va dala maydonlaridan kombaynlarni birma-bir nazoratdan o‘tkazib, g‘alla maydonidan chiqarib yuborgan. Shundan so‘ng, 3-otryad soat 00:00 da ‘Zarinabegim Safarova’ fermer xo‘jaligi dala maydonlarida ish boshlagan. Kombaynlar 03:50 gacha dala maydonlarini o‘rib, yakunlagan hamda navbati bilan boshqa fermer xo‘jaligi dalasida ish boshlagan. ‘Parizoda Ro‘ziqulova’ fermer xo‘jaligi dala maydonlariga 12-iyun kuni 16:45 larda 1-otryad rahbari boshchiligida yuqori unumli 3 dona ‘CASE’ kombaynlari o‘rimga tushirish uchun borilganda, fermer xo‘jaligi tomonidan rozilik berilmadi, — deyiladi hokimlik munosabatida.

Hokimlik rasmiy munosabatida shuningdek, g‘alla mavsumi uyushqoqlik bilan davom etayotgan tumanda bu kabi holat munosib emasligi, hozirda fermer xo‘jaliklari bilan kelib chiqqan holat muhokama qilinib, nazoratga olinganini bildirgan.

Bu holat shundayligicha qolib ketgan. Hech kim bizning g‘allamiz taqdiri bilan qiziqmayapti. Endi xususiy kombayn egalariga iltimos qilib, pulini berib, g‘allamizni o‘rdirib olishimiz kerak. Boshqa imkonimiz yo‘q, — deydi fermerlar.

“Daryo” voqealar rivojini kuzatishda davom etadi.