Тошкент вилояти ҳокими Зоир Мирзаев ғалладан бўшаган майдонларни ёқиб, атрофни заҳарлаган фермерларнинг ғалла майдони олиб қўйилиб, аукционда қайта сотувга қўйилишини маълум қилди. Бу ҳақда вилоят ҳокимининг шахсий Telegram-каналида хабар берилган.
“Ғалладан бўшаган ерларда сомон поясини ёқиш деҳқончиликка катта зиён етказади. Бу тупроқдаги микроорганизмлар, фойдали ҳашаротларни йўқотади, атроф-муҳитга катта зарар етказади. Вилоят фаоллари, қишлоқ хўжалиги соҳаси вакиллари иштирокида мана шу ҳолатлар муҳокама қилинди. Эндиликда ерга беписанд, ноҳалол муносабатда бўлган ҳар қандай шахснинг ери давлат тасарруфига қайтарилади. Бу борада позициямиз қатъий. Ер энг катта бойлигимиз ва ризқ-рўзимиз манбаи. Уни асраб-авайлаш муқаддас бурчимиз. Ўз навбатида, шундай ҳолатларга лоқайд бўлмай, муносабат билдираётган блогер ва ижтимоий тармоқлар фаолларига раҳмат айтамиз”, — дейди Зоир Мирзаев мазкур ҳолат ҳақида хабар берар экан.
Тошкент вилояти ҳокимлиги вилоят раҳбарининг масъуллар билан йиғилиш муҳокамаси видеосини эълон қилди.
“Кеча интернетда ёзишяпти, тутундан нафас олиб бўлмаяпти деб. Тошкент шаҳрида ғалла йўқ-ку, ғалла шаҳар атрофида, Тошкент вилояти ҳудудида-ку. Биз атрофни заҳарлаётган бўлсак, заҳарлаган одам нега жавоб бермайди? Одамларни астма қиляпти, бошқа касалликларни чиқаряпти. Бунга нима ҳаққи бор унинг, бундай одамлар нега фермер бўлиши керак?”, — дейди вилоят ҳокими Зоир Мирзаев.
Зоир Мирзаевнинг айтишича, ерини ёққан фермер катта эҳтимол билан уни сотиб олган.
“Каттаконларнинг фермери қилади, ерни сотиб олган ёқиб юборган. Қачонгача кимнингдир орқасида турган одамга биз андиша қилишимиз керак?”, — дейди у.
Тошкент ҳокими бир фуқарога 70-80 гектар етарли эканини, 300 гектарлаб ери бор фермерларнинг ортиқча ери олиниб, оддий одамларга берилиши кераклигини айтади.
“Бир одамга кўпи билан 70-80 гектар ер, қолганини қайтариб берсин, оддий халққа ҳам бериш керак. Эплолмаяпти-ку. Пилла боқмаса валломатлар, палончи-пистончининг қариндоши. Ғаллани бажармаса, Оққўрғон вилоят оёғига кишан бўлди. Пилла ҳам бўлмади, ғалла ҳам бўлмади. Нимага кластер билан юрибмиз ҳалигача? Кластер раҳбарининг қорни тўқ, уйи бор қўша-қўша, бундай бўлгач, халқни ўйлайдими? Эртага Оққўрғоннинг халқига ким бир ҳовуч ғалла беради?”, — дейди Зоир Мирзаев.
Вилоят ҳокими ерини ёққан фермерларнинг ери қайтариб олиниши кераклигини, аукционда савдога қўйилиши лозимлигини айтиб, шанба куни ерини қайтариб берган фермерлар иқрорини эшитмоқчилигини қўшимча қилди.
Изоҳ (0)