Ўзбекистон кетма-кет иккинчи ой дунёда энг кўп олтин сотган мамлакат бўлиб қолмоқда. Бу ҳақда World Gold Council компанияси маълумотларида келтирилган.
Қайд этилишича, жаҳон бўйлаб марказий банклар ноябрь ойида 44 тонна соф ҳажмда олтин сотиб олган. Харидларнинг умумий ҳажми 60 тонна бўлиб, октябрь ойига нисбатан 4 фоизга камайган. Бироқ бу ўтган йилдаги ўртача ойлик кўрсаткич — 36 тоннага нисбатан сезиларли даражада юқори.
Ноябрь ойида мазкур қимматбаҳо металлнинг асосий харидори Туркия бўлган. Мамлакат 25 тонна харидни амалга оширган. Иккинчи ўринни 19 тонна харид билан Польша эгаллаган. Бешликка Хитой (12 тонна), Чехия (3 тонна) ва Қирғизистон (1 тонна) кирган.
Ўзбекистон ноябрь ойида 11 тонна олтин сотган, бу эса кейинги ўринда турган Қозоғистондан (3 тонна) деярли тўрт баробар кўп.
2023 йил якунларига кўра, Ўзбекистон қимматбаҳо металларни сотиш бўйича Қозоғистондан бир оз ортда қолиб, иккинчи ўринни эгаллаган. Хитой соф харидлар бўйича етакчи бўлган, ундан кейинги ўринларни Польша ва Сингапур эгаллаган.
Эслатиб ўтамиз, октябрь ойида ҳам Ўзбекистон 11 тонна олтинни хорижга сотган ҳолда дунёдаги энг кўп олтин сотган мамлакатга айланганди. Шунингдек, 2023 йилнинг 11 ойидаги ташқи савдо айланмасига кўра, Ўзбекистоннинг олтин экспорти 2,3 баравар кўпайиб, рекорд даража — 8,1 миллиард долларни ташкил этган.
Олдинроқ Статистика агентлиги Ўзбекистон октябрь ойида 1,23 миллиард долларлик олтинни экспорт қилгани тўғрисида хабар берганди. Ўзбекистоннинг расмий захира активлари ноябрь ойида 8 миллион долларга камайиб, 2023 йил 1 декабрь ҳолатига кўра, 32 миллиард 896,5 миллион долларни ташкил этмоқда.
Изоҳ (0)