Олтин нархи бир унсия учун 2100 доллардан ошиб, рекорд ўрнатди. AFP маълумотларига кўра, савдолар очилишида металлнинг нархи 2135,39 долларга етган ва бу пандемия даврида 2020 йилда ўрнатилган аввалги рекорддан ошиб кетган.
Исроил ва Фаластиннинг ҲАМАС ҳаракати ўртасидаги уруш фонида савдогарлар орасида олтин қуймаларига қизиқиш ортди. AFP инфляциянинг секинлашишини яна бир омил сифатида тилга олади, бунинг фонида Федерал захира тизими (FХТ) ставкаларини пасайтириши мумкинлиги ҳақидаги тахминлар юзага келди.
Бундай тахмин FХТ раиси Жером Пауэлл 1 декабрь куни ставкалар “чекланган ҳудудда” эканини айтиб,“FXТ тез орада ставкаларни пасайтиришни бошлаши мумкинлигига умид уйғотганидан” кейин пайдо бўлди. Bloomberg’га кўра, трейдерлар 2024 йил март ойидан бошлаб бундай ҳаракатнинг 60 фоиз эҳтимолини кўришади.
Ноябрь ойи охирида жаҳон бозорида олтин нархи бир троя унсияси учун 2050 доллардан ошди ва охирги етти ойлик энг юқори кўрсаткичга етди. Таҳлилчиларнинг фикрича, металл котировкаларининг янада ошиши сезиларли бўлмайди ва йил охирига келиб нархлар 1,9 минг долларгача тушиши мумкин.
Изоҳ (0)