O‘zbekistonning tashqi savdo aylanmasi 2023-yilning yanvar-noyabr oylarida 57,3 milliard dollarni tashkil etib, o‘tgan yilning shu davriga nisbatan 11,88 milliard dollarga yoki 26,2 foizga o‘sdi. Bu haqda Statistika agentligi hisobotida so‘z boradi.
Eksport
Qayd etilishicha, noyabr oyida eksport miqdori 2,73 milliard dollarni tashkil etgan, biroq buning deyarli yarmi oltin hissasiga to‘g‘ri kelgan. 1,28 milliard dollarlik qimmatbaho metall sotilgan (bu Markaziy bankning oltin-valyuta zaxiralarining kamayishiga olib keldi). Oltin eksporti yil boshidan buyon rekord darajadagi 8,15 milliard dollarga yetgan, bu o‘tgan yilning shu davriga nisbatan 2,3 baravar ko‘p.
11 oy ichida oltin yetkazib berish mamlakat eksportning uchdan bir qismidan ko‘prog‘ini (35,1 foiz) tashkil etgan.
Eksportda sanoat mahsulotlarining ulushi keskin pasayib, 22,3 foizdan 16,2 foizga tushgan, yetkazib berish hajmi ham 3,96 milliard dollardan 3,75 milliard dollargacha kamaygan. Mashina va transport uskunalari sotuvi esa 875 million dollardan 1,2 milliard dollarga oshishi hisobiga ularning eksportdagi ulushi ham 4,9 foizdan 5,2 foizgacha oshgan.
Import
Import borasida oziq-ovqat xaridi yuqori darajada qolmoqda: don va undan tayyorlangan mahsulotlar 1,03 milliard dollar (+7,8 foiz), shakar, shakar va asal mahsulotlari 511,1 million dollar (-3,5 foiz), qahva, choy, kakao, ziravorlar 344 million dollar (+24 foiz), o‘simlik moylari va yog‘lar 321,6 million dollar (+29,4 foiz), go‘sht va go‘sht mahsulotlari 308 million dollar (+8,5 foiz), sabzavot va mevalar 301,9 million dollar (+22,6 foiz), sut mahsulotlari va tuxum 192,7 million dollar (+34,5 foiz).
Neft va neft mahsulotlari (1,38 mlrd dollar, +26,9 foiz), ko‘mir, koks va briketlar (189,2 million dollar, +78,8 foiz) ham importi oshdi. Gaz yetkazib berish 2,1 baravarga — 562,7 million dollargacha ko‘paydi. Agar sentyabr oyida 286 mln dollarlik gaz import qilingan bo‘lsa, oktyabrda 73,8 million dollarlik, noyabrda esa 1 mln dollarlik import amalga oshirilgan.
Avtomobillar importi 1,56 milliard dollarga (2,2 baravar), ehtiyot qismlarniki 1,34 milliard dollarga (+16,8 foiz), samolyotlar va boshqa uchuvchi apparatlar importi esa 753,6 million dollargacha (3,4 barobar) oshgan. Shu bilan birga, noyabr oyida 139,5 million dollarlik samolyotlar yetkazib berildi.
Oldinroq Statistika agentligi O‘zbekiston oktyabr oyida 1,23 milliard dollarlik oltinni eksport qilgani to‘g‘risida xabar bergandi. O‘zbekistonning rasmiy zaxira aktivlari noyabr oyida 8 million dollarga kamayib, 2023-yil 1-dekabr holatiga ko‘ra, 32 milliard 896,5 million dollarni tashkil etmoqda.
Izoh (0)