Ўзбекистон бюджетидан 2024 йилда ярим миллион талабага таълим кредитлари ажратиш режалаштирилмоқда. Ҳозирда талабалар сони бир миллион нафардан ортиқ.
Ўзбекистонда 2024 йил учун тасдиқланган давлат бюджетида таълим кредитини молиялаштириш учун ажратиладиган маблағлар миқдорини ошириш белгиланган.
Бюджет қонунида 2021 – 2023 йилларда жами 315 минг талабага (шундан 219 минг талаба хотин-қизлар) таълим кредитлари учун 3,3 триллион сўм ресурс маблағлари ажратилган.
Жорий йилда қўшимча 180 минг нафар талабаларга таълим кредитларини ажратиш учун маблағлар режалаштирилиб, ушбу дастур билан қамраб олинадиган талабалар сони қарийб 500 мингга етиши кутилмоқда. Бу мақсадлар учун 2024 йилда жами 2,2 триллион сўм ажратилади. Шундан 1,8 триллион сўми таълим кредитларини молиялаштиришга, 400 миллиард сўми хотин-қизларга ажратилган кредитлар фоиз қисмини қоплашга йўналтирилади.
Стипендиялар учун эса йил якунигача 1,9 триллион сўм йўналтирилади.
Шу билан бирга, бу йил давлат бюджетидан талабалар турар жойини барпо этиш субсидияларига 250 миллиард сўм, магистратурада ўқиётган хотин–қизларнинг контракт тўловлари субсидияларига 200 миллиард сўм, талабалар ойлик ижара тўлови харажатларининг бир қисмини қоплаш учун 200 миллиард сўм сарфланади.
Давлат ОТМлари сони 2023 йилда 132 тани ташкил этган бўлса, 2024 йилда яна 8 та ОТМ очилиши белгиланган. Ўтган йили талабалар сони 1 миллион 15 минг 400 нафарга етганди. Жорий йил уларнинг умумий сони 1 миллион 67 минг 700 нафар бўлиши кутилмоқда. Шундан давлат грант асосида ўқийдиган талабалар 204 минг 500 кишини, тўлов контрактда таҳсил оладиганлари 863 минг 100 киши.
Бу йил ОТМларини сақлаш харажатларига 18,5 триллион сўм сарфланиши кўзда тутилган. Шундан 6 триллион сўми бюджетдан, 12,5 триллион сўми тўлов контрактлар ҳисобидан тўланади.
Изоҳ (0)