Президент Шавкат Мирзиёев Ўзбекистон халқига йўллаган Янги йил табригида 2024 йилда иш ҳақи, пенсия, стипендиялар ва нафақалар миқдори оширилишини маълум қилди. Хўш, бу йил мазкур тўловлар учун давлат бюджетидан қанча маблағ сарфланади?
Жорий йилда давлат бюджетидан иш ҳақи (ижтимоий солиқ билан), стипендиялар ва ижтимоий нафақалар учун жами 177,1 триллион сўм ажратилади. Бу ҳақда “2024 йил учун Ўзбекистон Республикасининг давлат бюджети тўғрисида”ги қонунда белгиланган. Мазкур миқдор жами давлат бюджети харажатларининг 56,6 фоизига тенг.
Қонунда бу йилги иш ҳақи, пенсиялар, стипендиялар ва нафақалар миқдорини, шунингдек, айрим хизматлар турлари бўйича тарифларни ошириш билан боғлиқ харажатлар учун қўшимча 9,5 триллион сўм ажратилиши белгиланган.
Харажатларнинг энг йирик миқдори иш ҳақи ва ижтимоий солиқ харажатларига — 129,1 триллион сўм йўналтирилади. Стипендияларга 1,9 триллион сўм, ижтимоий нафақаларга 18,6 триллион сўм ажратилади.
Жорий йилдаги иш ҳақи, стипендия ва ижтимоий нафақалар учун харажатлар миқдори ўтган йилдагидан 26,6 триллион сўм ( 2023 йилдаги кўрсаткич 150,5 триллион сўм) кўп бўлиши режалаштирилган.
Бюджет қонунчилигига кўра, 2024 йилда Пенсия жамғармасига 16 триллион сўм маблағ йўналтирилади (2023 йилдаги миқдор 15 триллион сўм). Прогноз қилинишича, 2025 йилда жамғармага 19 триллион сўм, 2026 йилда эса 23 триллион сўм маблағ ажратилади.
Аввалроқ 2024 йилда давлат идораларига бюджетдан жами 255,44 триллион сўм ажратилиши белгилангани хабар қилинганди.
Изоҳ (0)