Айрим ҳолатларда фуқароларда бир вақтнинг ўзида икки турдаги пенсияни олиш учун ҳуқуқи пайдо бўлади. Бундай вазиятларда фуқароларга қандай пенсия тайинланади?
Пенсия жамғармасининг маълум қилишича, “Фуқароларнинг давлат пенсия таъминоти тўғрисида”ги қонуннинг 4-моддасида давлат пенсияларининг турли хилларини олиш ҳуқуқига эга бўлган фуқароларга уларнинг ўзлари танлаган битта пенсия тайинланади.
“Яъни агар фуқароларда икки ёки ундан ортиқ пенсияни олиш учун ҳуқуқ пайдо бўлганда, юқоридаги қонун моддасига асосан фуқаронинг танлови билан фақат битта турдаги пенсияни олиши мумкин бўлади”, — дея эслатиб ўтди жамғарма.
Аввалроқ ёшга доир пенсияга муддатидан аввал чиқиш борасида маълумот берилганди. Унга кўра, технологиядаги, ишлаб чиқариш ва меҳнатни ташкил этишдаги ўзгаришлар, ходимлар сони ёки иш хусусиятининг ўзгаришига олиб келган ишлар ҳажмининг қисқаргани ёхуд корхонанинг тугатилгани муносабати билан ишдан озод этилган ва ишсиз деб эътироф этилган шахслар:
эркаклар — 58 ёшга тўлганда ва иш стажи камида 25 йил бўлган тақдирда;
аёллар — 53 ёшга тўлганда ва иш стажи камида 20 йил бўлган тақдирда пенсия олиш ҳуқуқига эга бўлади.
Қонунчиликка биноан, ёшга доир пенсияга эркаклар 60 ёшда, иш стажи камида 25 йил бўлганда чиқиши мумкин. Аёллар эса 55 ёшда, иш стажи камида 20 йил бўлган тақдирда шундай турдаги пенсия олиш ҳуқуқига эга бўлади.
Пенсия тайинлаш учун етарлича иш стажига эга бўлмаган шахсларга ёшга доир пенсиялар камида 7 йил иш стажи мавжуд бўлган тақдирда, бор стажга мутаносиб миқдорда тайинланади.
Изоҳ (0)