Аннексия қилинган Қрим осмонида 24 июль куни эрталаб ҳаво ҳужумидан мудофаа кучлари 11 та Украина дронини уриб туширди, деб хабар бермоқда яриморол раҳбари Сергей Аксенов.
“Жанкой туманидаги ўқ-дорилар омборига зарба берилди. Шунингдек, Кировский туманидаги хусусий уй учувчисиз учоқ бўлаклари тушишидан зарар кўрди”, — деб ёзди расмий ўзининг Telegram-каналида.
Дронлар ҳужуми туфайли “хавфсизлик нуқтаи назаридан” Жанкой туманидаги темир йўл ва Жанкой-Симферопол автомобиль йўлида ҳаракат тўхтатилди, деб қўшимча қилди Аксенов.
Ўтган ҳафтада Қрим раҳбарияти икки марта ўқ-дорилар омборига учувчисиз учоқлар ҳужум қилгани ҳақида хабар берганди. 19 июль куни Кировский туманидаги ўқув полигонида ёнғин содир бўлди, оқибатда яқин атрофдаги аҳоли пунктлари аҳолиси вақтинча эвакуация қилинди. 22 июль кунги дрон ҳужумида эса Красногвардейский туманидаги ўқ-дорилар омборида портлашлар содир бўлди. Қурбонлар ҳақида маълумот берилмаган.
Эслатиб ўтамиз, 17 июль куни Қрим кўпригида портлаш содир бўлди. Оқибатда икки киши ҳалок бўлган, 14 ёшли қиз жароҳатланган. Кўприкда ҳаракатланиш бир неча соатга тўхтатилган.
Россия расмийлари кўприкнинг бузилишини “Киев режимининг террористик ҳаракати” деб атади. Россия президенти Владимир Путин ҳужумга “жавоб” ваъда қилди.
Украина портлашга алоқадорлигини расман тасдиқламади. Украина разведкаси ва хавфсизлик хизматидаги манбалар портлаш УХХ ва Украина Ҳарбий-денгиз кучларининг қўшма операцияси бўлганини, кўприкни портлатиш учун сув усти дронлари қўлланганини таъкидлади.
Изоҳ (0)