Россиялик мухолифатчи Алексей Навальний тирик ва ҳозир Ямал-Ненец автоном округидаги Харп қишлоғида жойлашган жазони ўташ колониясида сақланмоқда. Бу ҳақда унинг матбуот котиби Кира Ярмиш хабар берди.
“Алексей Навальнийни топдик. У Ямал-Ненец автоном округининг Харп қишлоғидаги 3-колонияда. Адвокат бугун уни кўрди. Алексейнинг аҳволи яхши”, — деб ёзди Ярмиш 25 декабрь куни Х’да.
Коррупцияга қарши курашиш жамғармаси директори Иван Жданов Навальнийнинг шериклари 618 та сўров юборганини ва адвокатлар Навальнийни топиш учун “ҳар бир тергов изоляторини, баъзан бир неча марта” қидириб чиққанини айтди. Ждановнинг сўзларига кўра, 3-колония “энг шимолий ва узоқ колониялардан бири”.
“Бу иш — одамни дунёдан узиш, изоляция қилишнинг энг олий даражаси. Ҳаммаси шунинг учун қилинди” — деб қўшимча қилди Навальнийнинг сафдоши Леонид Волков.
Алексей Навальний билан 6 декабрдан бошлаб алоқа узилиб қолганди. Дастлаб, бир неча кун давомида унинг адвокатлари турли баҳоналар билан Владимир вилоятидаги жазони ўташ колониясига киритилмади. Кейинчалик, унинг колониядан бошқа жойга кўчирилгани айтилди. Аммо адвокатлар унинг қаерга кўчирилгани ҳақида маълумот ололмади.
Изоҳ (0)