Россия Мудофаа вазирлиги маълумотларига кўра, аввалроқ ёнғин сабаб корпуси шикастланган Россиянинг «Москва» ракета крейсери белгиланган портга олиб кетилаётганда чўкиб кетди.
Вазирлик маълумотларига кўра, кема бўронли денгиз шароитида ўзининг барқарорлигини йўқотган. Крейсер экипажи ҳудуддаги Россия Қора денгиз флоти кемаларига эвакуация қилинди, дея қўшимча қилди ҳарбийлар.
13 апрель куни кечқурун Украина оммавий ахборот воситалари ва сиёсатчилар «Москва» крейсери Украинада ишлаб чиқарилган иккита «Нептун» қанотли ракеталари билан урилгани ҳақида хабар берганди. Кейинроқ Россия Мудофаа вазирлиги крейсерда ёнғин чиққанини, натижада ўқ-дорилар портлаганини маълум қилди. Вазирлик ёнғин сабабларини маълум қилмаган. Эртаси куни Россия Мудофаа вазирлиги крейсердаги ёнғин тўхтатилгани ва кема портга олиб кетилаётганини маълум қилди. Крейсер экипажи орасида жабрланганлар ёки қурбонлар бўлиши мумкинлиги ҳақида маълумотлар йўқ.
1976 йилда қурилган ва C-300 га ўхшаш «Форт» ҳаво мудофаа тизими билан жиҳозланган «Москва» ракета крейсери Россия Қора денгиз флотининг флагмани эди. Украина ОАВларининг ёзишича, Россиянинг Украинага бостириб кириши пайтида Москва крейсери Одесса вилоятидаги Змений ороли яқинидаги операцияда иштирок этган ва Россия ҳарбий кемасига сўкиниш билан айтилган ибора айнан унга қаратилган.
Крейсер қатор қуролли можароларда, жумладан Сурия урушида иштирок этган. Шундан кейин кемани бир неча йил мобайнида таъмирлашган. Кема экипажи 510 кишини, узунлиги 190 метрни ташкил этарди. У қанотли ракеталар мажмуаси, бир неча зенит-ракеталар мажмуалари, артиллерия ва кемага қарши қуроллар билан жиҳозланганди. Россия президенти Владимир Путин бир неча марта хорижлик етакчилар билан кема бортида бўлган.
Изоҳ (0)