“Наслчилик хўжаликларини давлат томонидан қўллаб-қувватлашга доир қўшимча чора-тадбирлар тўғрисида”ги президент қарори қабул қилинди. Бу ҳақда Telegram’даги “Ҳуқуқий ахборот” канали хабар берди.
Қарорга кўра, наслчилик субъектлари учун уларнинг асосий фаолият тури бўйича фойда солиғи (тижорат банкларида жойлаштирилган маблағлардан олинган фоизлардан ташқари), мол-мулк солиғи, ер солиғи ва сув ресурсларидан фойдаланганлик учун солиқни 50 фоиз пасайтирилган ставкада тўлаш шаклидаги солиқ имтиёзи муддати иқтисод қилинган маблағларни асосий фаолиятни ривожлантиришга йўналтириш шарти билан 2025 йил 1 январга қадар узайтирилди.
Эслатиб ўтамиз, президентнинг август ойидаги қарорига мувофиқ 2023 йил 1 декабрдан бошлаб чорвачилик хўжаликлари ўз эҳтиёжи учун импорт қилган наслдор қорамолларга ҳисобланган қўшимча қиймат солиғини Ветеринария ва чорвачиликни ривожлантириш қўмитаси кафолати асосида 180 кун ичида тўлаб бериш тизими жорий қилинган.
Бундан ташқари, 2023 йил 1-сентябрьдан бошлаб, 2025 йил 31 декабрга қадар давлат томонидан чорвачилик маҳсулотларини етиштирувчи хўжаликларга хорижий давлатдан импорт қилинган наслдор қорамолларнинг ҳар бир бошига 2 миллион сўмдан, наслдор қўй ва эчкининг ҳар бир бошига 400 минг сўмдан, паррандачилик хўжаликларига ҳар бир бош бир кунлик наслдор жўжани импорт қилиш билан боғлиқ харажатларнинг 15 минг сўмини қоплаш учун субсидиялар ажратилиши айтилган эди.
Изоҳ (0)