Таъмирлаш ишлари туфайли бугун, 26 декабрь куни Шаҳрисабз шаҳри, Чироқчи, Яккабоғ, Китоб ва Шаҳрисабз туманида табиий газ таъминоти вақтинча тўхтатилади. Бу ҳақда “Ҳудудгаз Қашқадарё” ГТФ матбуот хизмати хабар берди.
Қайд этилишича, Муборак Магистрал газ қувури бошқармасининг 02/86-сонли факсограммасига асосан айни дақиқалардан таъмирлаш ишлари якунлангунга қадар, Шаҳрисабз шаҳри, Чироқчи, Яккабоғ, Китоб ва Шаҳрисабз туманида табиий газ таъминоти вақтинча тўхтатилади.
Шунингдек, юқоридаги ҳудудларда жойлашган 21 та автомобилларга газ тўлдириш компрессор шохобчасида ҳам газ бўлмайди.
Юзага келаётган ноқулайликлар учун газ таъминоти филиали истеъмолчилардан узр сўрайди.
Декабрь ойи бошида баъзи вилоятлардагина метан заправкаларга чеклов киритилган бўлса, 8 декабрь куни бу тартиб Ўзбекистон бўйича жорий этилган эди. Кейинроқ, 12 декабрдан газ заправкалар соат 06:00 дан 12:00 гача ишлаш режимига ўтганди. Шу куннинг эртасига, 13 декабрь куни пойтахт, Самарқанд, Тошкент, Андижон, Наманган ва Фарғона вилоятларидаги АГТКШларнинг фаолиятига қўшимча чекловлар киритилди. Мазкур вилоятларга киритилган чеклов 15 декабрдан юмшатилди, лекин тўла очилганича йўқ.
Изоҳ (0)