Қорақалпоғистон Республикаси ва Бухоро вилоятида ноқонуний йўллар билан ҳайдовчилик гувоҳномаларини олиб беришни ваъда қилган шахслар қўлга олинди, деб хабар беради Бош прокуратура ҳузуридаги департамент.
Қайд этилишича, департаментнинг Беруний туман бўлими ҳамда ДХХ ходимлари ҳамкорликда ўтказган тезкор тадбирда Ш.А. исмли шахс 5 нафар фуқарога гўёки ЙҲХБда ишловчи танишлари ёрдамида ҳайдовчилик гувоҳномаларини олиб бериш эвазига 2,5 минг долларни олган вақтида ашёвий далиллар билан ушланган.
Шу каби, департаментнинг Когон шаҳар бўлими томонидан ИИБ ходимлари билан ҳамкорликда ўтказилган тезкор тадбирда Ҳ.И. исмли шахс фуқаро М.Ф.нинг ишончига кириб, унга юқори лавозимда ишловчи танишлари ёрдамида 400 доллар эвазига ҳайдовчилик гувоҳномасини олиб беришини айтиб, олдиндан 300 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида бўлса, Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)