Жанубий Корея ҳукумати Россия ва Беларусга яна 682 турдаги товарлар, жумладан, автомобилларни етказиб беришни тақиқлайди. Бу ҳақда Жанубий Корея Савдо, саноат ва энергетика вазирлиги хабар бермоқда.
Жанубий Корея ҳукумати экспорт назорати рўйхатига ўзгартиришлар киритди. Ўзгаришлар 2024 йил бошидан кучга киради.
Хусусан, етказиб бериш чекланган товарлар рўйхатидан қуйидагилар жой олди:
- оғир турдаги қурилиш ускуналари,
- қайта зарядланувчи батареялар,
- авиация ускуналари учун компонентлар,
- двигатель ҳажми 2000 куб сантиметрдан ортиқ бўлган енгил автомобиллар.
Жанубий Корея 2022 йилдан бошлаб Россияга янги автомобилларни экспорт қилишни тақиқлаганди. Ушбу тақиққа қиймати 50 минг доллардан ортиқ бўлган автомобиллар киритилганди.
2023 йил июнь ойида Европа Иттифоқи Россияга двигатель ҳажми 1,9 литрдан ортиқ бўлган барча янги ва эскирган автомобиллар, электромобиллар ва гибрид автомобилларни экспорт қилишни тақиқлади. Япония ҳам худди шундай тақиқни жорий қилди. Россия федерал божхона хизмати маълум қилишича, 2023 йилнинг биринчи ярмида Жанубий Корея ва Япониядан Узоқ Шарқ орқали рекорд даражадаги 130 минг автомобиль олиб келинган.
Изоҳ (0)