Жанубий кореялик бир гуруҳ абитуриентлар олий ўқув юртларига ўқишга кириш учун йиллик миллий имтиҳон вақти 90 сонияга қисқаргани сабабли мамлакат расмийларига қарши жамоавий даъво аризаси билан чиқди.
Ҳозирча 39 нафар даъвогарни ўз ичига олган гуруҳ уларнинг ҳар бири учун 20 миллион вон (15,4 минг доллар) миқдорида товон пули талаб қилмоқда. Бу муҳим имтиҳонни қайта топшириш учун бир йил давомида ўқишга кетадиган пул миқдорига тенг. Бу ҳақда BBC хабар бермоқда.
Жанубий Кореядаги “Сунеунг” — Миллий кириш имтиҳони дунёдаги энг оғир имтиҳонлардан бири ҳисобланади. Имтиҳон бир кунда барча фанларни синовдан ўтказишни назарда тутади, шунинг учун имтиҳон бир неча танаффуслар билан тахминан 8 соат давом этади. Имтиҳондан муваффақиятли ўтиш (90-100 балл) талабаларга нуфузли университетларга кириш имконини беради. Анъанага кўра, “Сунеунг” ноябрь ойининг ўрталари ва охирларида ўтказилади, натижалар декабрь ойининг биринчи ярмида маълум бўлади.
Даъвогарларнинг сўзларига кўра, бу гал тест якунланганини билдирувчи қўнғироқ биринчи синов вақтида бир ярим дақиқа олдин янгради. Комиссия вақтни назорат қилишда хатоликни тан олди ва танаффусдан кейин бир ярим дақиқа қўшиб қўйди, лекин шу билан бирга фақат тугалланмаган вазифаларни бажаришга рухсат берди ва ёзиб бўлинган вазифаларни тузатишга имкон берилмади. Талабаларнинг фикрига кўра, бу вазият уларни шунчалик безовта қилганки, улар қолган тестларга жавоб беришда эътиборларини жамлай олмадилар ва ўз билганларидан кўра ёмонроқ жавоб беришди.
Имтиҳон вақтини нотўғри белгилаш бўйича шунга ўхшаш даъволар аввал ҳам Жанубий Кореяда қўзғатилган. Жорий йилнинг апрель ойида 2021 йилдаги тестлардан бири икки дақиқага қисқароқ бўлганидан шикоят қилган даъвогарлар гуруҳининг ҳар бирига 5250 доллар миқдорида товон пули берилганди.
Изоҳ (0)