Janubiy Koreya hukumati Rossiya va Belarusga yana 682 turdagi tovarlar, jumladan, avtomobillarni yetkazib berishni taqiqlaydi. Bu haqda Janubiy Koreya Savdo, sanoat va energetika vazirligi xabar bermoqda.
Janubiy Koreya hukumati eksport nazorati ro‘yxatiga o‘zgartirishlar kiritdi. O‘zgarishlar 2024-yil boshidan kuchga kiradi.
Xususan, yetkazib berish cheklangan tovarlar ro‘yxatidan quyidagilar joy oldi:
- og‘ir turdagi qurilish uskunalari,
- qayta zaryadlanuvchi batareyalar,
- aviatsiya uskunalari uchun komponentlar,
- dvigatel hajmi 2000 kub santimetrdan ortiq bo‘lgan yengil avtomobillar.
Janubiy Koreya 2022-yildan boshlab Rossiyaga yangi avtomobillarni eksport qilishni taqiqlagandi. Ushbu taqiqqa qiymati 50 ming dollardan ortiq bo‘lgan avtomobillar kiritilgandi.
2023-yil iyun oyida Yevropa Ittifoqi Rossiyaga dvigatel hajmi 1,9 litrdan ortiq bo‘lgan barcha yangi va eskirgan avtomobillar, elektromobillar va gibrid avtomobillarni eksport qilishni taqiqladi. Yaponiya ham xuddi shunday taqiqni joriy qildi. Rossiya federal bojxona xizmati ma’lum qilishicha, 2023-yilning birinchi yarmida Janubiy Koreya va Yaponiyadan Uzoq Sharq orqali rekord darajadagi 130 ming avtomobil olib kelingan.
Izoh (0)