Шимолий Кореянинг жосуслик сунъий йўлдоши учирилганидан бир ярим ҳафта ўтгач, Жанубий Корея ҳам ўзининг биринчи ҳарбий разведка сунъий йўлдошини коинотга юборди. Бу ҳақда 2 декабрь куни AFP хабар берди.
Аппарат Американинг SpaceX аэрокосмик компаниясининг Falcon 9 ракета ташувчиси ёрдамида Калифорния штатидаги Ванденберг космик марказидан ҳавога кўтарилди. Жанубий Корея мазкур сунъий йўлдошдан ядро қуролига эга Шимолий Корея фаолиятини кузатишда фойдаланмоқчи.
Жанубий Кореянинг айғоқчи сунъий йўлдоши Ер атрофида 400-600 километр баландликда айланиб чиқади ва ўлчами 30 сантиметргача бўлган нарсаларни аниқлай олади. Жанубий Корея Мудофаа вазирлиги баёнотида мамлакат сунъий йўлдош технологиялари соҳасида дунёдаги энг илғор бешта давлатдан бири эканини таъкидлади. 2025 йил охиригача Сеул коинотга яна тўртта кузатув йўлдошини учиришни режалаштирмоқда.
Пхеньян иккита муваффақиятсиз уринишдан сўнг ўз сунъий йўлдошини учирди
Жанубий Кореянинг Санджи университетидан ҳарбий эксперт Чой Ги-Ил AFP’га берган интервьюсида шу пайтгача Жанубий Корея АҚШ томонидан бошқариладиган жосуслик сунъий йўлдошларига таяниб келганини айтди. Сеул аввал орбитага ҳарбий алоқа учун зарур сунъий йўлдошларни юборган. Бироқ разведка сунъий йўлдошларини учириш “мураккаб технологик тўсиқлар” туфайли узоқ вақт олган.
Шимолий Корея май ва август ойларида ўтказилган иккита муваффақиятсиз уринишлардан сўнг ноябрь ойида ўз кузатув сунъий йўлдошини учирди.
Кейинроқ Жанубий Корея Шимолий Корея сунъий йўлдоши орбитага муваффақиятли учирилганини тасдиқлади. Пхеньян маълумотларига кўра, ушбу қурилма аллақачон Оқ уй ва Вашингтондаги Пентагон, шунингдек, Америка ва Жанубий Корея ҳарбий базаларини батафсил суратга олган.
Изоҳ (0)