Божхона қўмитаси 1,6 млрд сўмлик тендер ўтказди. Унда бир кишига тегишли деб гумон қилинаётган МЧЖлар қатнашди

Божхона қўмитаси божхоначиларга формали кийим-бошлар етказиб бериш бўйича танлов (тендер) ўтказди. Тендерда таъсисчиси бир киши экани гумонланаётган икки МЧЖ иштирок этиб, 8 декабрь, дам олиш куни тендер ғолиби аниқланди. Бу ҳақда Telegram’даги “Ревизор” канали хабар берди. 

Таъкидланишича, тендерда Leyla stile ва “Креатив” МЧЖлар иштирок этиб, божхоначилар формасини етказиб бериш бўйича 1 миллиард 600 миллион 704 минг сўм нарх таклиф қилган Leyla stile МЧЖ ғолиб деб топилган. 

Очиқ манбалардаги маълумотларга кўра, тендерда ўзаро курашиб ғолиб ва мағлуб деб топилган икки компания бир-бирига боғлиқ. Leyla stile МЧЖнинг таъсисчиларидан бири Бурнашева Ирада Илдаровна муқаддам “Креатив” МЧЖ раҳбари ва ягона таъсисчиси бўлган. Шунингдек, Leyla stile МЧЖ жойлашган манзил — Юзробод кўчаси 1-2-уйда “Креатив” МЧЖ ҳам фаолият юритган. “Креатив” МЧЖнинг электрон почта манзили сифатида burnashevairada@gmail.com кўрсатилган, — дейилади бу ҳақдаги хабарда.  

Канал муаллифининг қўшимча қилишича, тендер ғолиби 2023 йил 8 декабрь, дам олиш куни аниқланган.

Аввалроқ Тошкент вилояти Ихтисослаштирилган соматика шифохонаси томонидан бошланғич қиймати 500 миллион сўмлик шубҳали тендер ўтказилиб, кўп ўтмай бекор қилингани ҳақида хабар берилганди.