Ўзбекистондаги боғча ва мактаб болаларига етказиб бериладиган “Антиструмин” дори воситасини харид қилиш бўйича жами 21 миллиард 875 миллион сўмлик шартнома тузилгани аниқланди. Бу ҳақда Давлат харидлари порталидаги маълумотларда келтирилган.
Соғлиқни сақлаш вазирлиги таъсисчилигидаги “Ўзмедимпекс” МЧЖ калий йодид 1 мг (0,001 г) №100 (“Антиструмин”) дори воситасини харид қилиш учун 2022 йил июнь ойида “Само” МЧЖ билан 5 миллиард 610 миллион сўмлик тўғридан тўғри шартнома тузган. 2023 йил 11 январда эса ушбу шартномага 956 миллион сўмлик қўшимча келишув қилинган.
“Ўзмедимпекс” 2023 йил 4 майда яна “Антиструмин” дори воситасини харид қилиш учун “Само” МЧЖ билан 15 миллиард 275 миллион сўмлик тўғридан тўғри шартнома тузган. Ушбу шартномаларга кўра, жами 21 миллиард 875 миллион сўм маблағ эвазига “Само” МЧЖ 3 миллион 550 мингта миқдорда “Антиструмин” етказиб бериши кўрсатилган.
Маълум бўлишича, “Антиструмин” дори воситасини харид қилиш учун ҳеч қандай тендер ўтказилмаган, шартномалар тўғридан тўғри тузилган. “Само” МЧЖ таъсисчиларидан бири Нодир Юнусов АҚШ божхона ва иммиграция назорати хизмати томонидан қидирувга берилгани ҳақида хабарлар тарқалганди. Унга одам савдоси, қул меҳнати, фирибгарлик, рекетчилик ва коррупцияга учраган ташкилот ташкил этиш каби айбловлар қўйилган.
Нодир Юнусов, шунингдек, Zuma Pharma МЧЖ раҳбари ҳам саналади. Давлат харидлари порталида “Ўзмедимпекс” Zuma Pharma билан ҳам тузган шартномалар ҳақида маълумот бор. Жумладан, 7000 дона шприц-ручка эритропоэтин воситасини етказиб бериш бўйича 782 миллион сўмлик тўғридан-тўғри шартнома тузилган.
Эътиборлиси, ҳар иккала МЧЖ таъсисчиларида Юнусов фамилияли шахслар кўплигини кўриш мумкин. Zuma Pharma корхонаси раҳбари Нодир Юнусов бўлса, Фаррух Юнусов раҳбарлигидаги “Само” МЧЖ корхонаси таъсисчилари қаторида Нодир Юнусов, Холида Юнусова бор.
Айни пайтда “Само” корхонасининг фармацевтик фаолияти бўйича текширув ишлари олиб борилмоқда.
Изоҳ (0)