Ғарбий Ҳиндистон соҳили яқинида 20 кишининг жасадини олиб кетаётган қайиқ топилди

Ғарбий Ҳиндистондаги Турк ва Кайкос архипелаги яқинида 24 июнь куни 20 кишининг жасадини олиб кетаётган қайиқ топилди.

Turks and Caicos Sun нашрининг хабар беришича, Буюк Британиянинг мазкур автоном ҳудуди маъмурлари қайиқ қаердан келганини, шунингдек, ундаги одамларнинг нима сабабдан ўлганини аниқлашга уринмоқда.

Тахминларга кўра, улар ноқонуний муҳожирлар бўлган, аммо маҳаллий полиция комиссари Тревор Боттингнинг сўзларига кўра, қайиқ «Кариб денгизи ташқарисидан» келган. Гаитилик ноқонуний муҳожирлар кўпинча Багама оролларига ёки турмуш даражаси сезиларли даражада юқори бўлган Турк ва Кайкос оролларига боришга ҳаракат қилади. Гаити қирғоғидан то қайиқ топилган Гранд Турк оролигача бўлган масофа 200 километрдан ортиқ.

Шунингдек, қайиқда Багама оролларидан АҚШга етиб олишни истаган Доминикан Республикаси муҳожирлари бўлиши мумкин деган тахминлар мавжуд. Бироқ нашрнинг ёзишича, ҳозирда кеманинг оролга Африка ғарбий қирғоғидан Атлантика орқали келгани ҳақидаги тахмин текширилмоқда. Шундай бўлган тақдирда қайиқдагилар сувсизликдан ҳалок бўлган бўлиши мумкин. Associated Press хабарига кўра, улар орасида икки боланинг ҳам жасади бор.

«Қайиқдаги одамларнинг ўлимига нима сабаб бўлгани аниқланмаган бўлса-да, қасддан қилинган қотиллик эҳтимоли мавжуд эмас, Бироқ тергов уларнинг қандай қилиб ҳалок бўлгани ҳақидаги барча версияларни ўрганмоқда», — дейилади Турк ва Кайкос полиция бошқармаси матбуот хизмати томонидан тарқатилган баёнотда.