Фарғонада ҳаракатдаги Spark устига чиқиб олган йигитлар жавобгарликка тортилди. Бу ҳақда Фарғона вилояти ИИБ ахборот хизмати хабар берди.
Ижтимоий тармоқларда Фарғонадаги тўйда бир неча йигит ҳаракатланиб кетаётган Spark устига чиқиб олгани акс этган видео тарқалди.
Вилоят ИИБга кўра, мазкур машина ҳайдовчиси ва йигитлар қўлга олиниб, жавобгарликка тортилган. Шунингдек, воқеада иштирок этган бошқа йигитлар ҳам қилган ишидан пушаймон эканини айтиб, кечирим сўраган.
Жиноят ишлари бўйича Учкўприк тумани судида мазкур ҳуқуқбузарлик кўриб чиқилган. Суд қарорига кўра, уч нафар йигитга Маъмурий жавобгарлик тўғрисидаги кодекснинг тегишли моддалари билан 5 суткадан маъмурий қамоқ жазоси тайинланди.
Эслатиб ўтамиз, 2022 йилда Сурхондарё вилояти Термиз шаҳрида Malibu люкидан танасини чиқариб, рақсга тушган аёлларга нисбатан 15 сутка маъмурий қамоқ жазоси тайинланганди. Шунингдек, 2023 йилнинг ноябрь ойида Тошкент вилояти Оққўрғон туманида куёв келинни вертолётда олиб кетгани акс этган видео тарқалиб, кўплаб муҳокамаларга сабаб бўлган эди.
Изоҳ (0)