Surxondaryo viloyati Termiz shahrida Malibu lyukidan tanasini chiqarib, raqsga tushgan ayollarga nisbatan 15 sutka ma’muriy qamoq jazosi tayinlandi. Bu haqda Ichki ishlar vazirligi ma’lum qildi.
Qayd etilishicha, huquqbuzarlik shahardagi kameralarga tushib qolgan. Tezkor tartibda olib borilgan tekshiruv ishlari jarayonida qo‘pol ravishda yo‘l harakati qoidalarini buzib harakatlangan haydovchilar va yo‘lovchilarning shaxsiga aniqlik kiritilib, shahar ichki ishlar bo‘limi tergov bo‘linmasiga olib borilgan.
Huquqbuzarlik sodir etganlarning biri — 23 yoshli ayol 4 nafar farzandini uyda qoldirib, o‘zi bu kabi ishlarni sodir etib yurganidan afsusdaligini ta’kidlagan. Uning 21 yoshli sherigi muqaddam huquqbuzarlik sodir etgani uchun 8 oy muddatga Sherobod tumani 41-manzil koloniyasida jazo o‘tagani ma’lum bo‘lgan. Ikki Malibu haydovchilari ham oilali erkaklar bo‘lgani ochiqlangan.
Holat yuzasidan Ma’muriy javobgarlik to‘g‘risidagi kodeksning 183-moddasi (mayda bezorilik)ga asosan ayollarga nisbatan 15 sutka ma’muriy qamoq jazosi tayinlangan.
Izoh (0)