Тошкент вилояти Чирчиқ шаҳрида Spark ойнасидан танасини чиқариб кетаётган қиз сурати интернетда тарқалди. Ҳолат юзасидан вилоят ЙҲХБ ўрганиш олиб борди.
Қайд этилишича, ҳолат Тошкент вилояти ИИББ ЙҲХБ ходимлари томонидан ўрганиб чиқилди ва ушбу автоулов аниқланди.
Ҳодиса Тошкент вилоятининг Чирчиқ шаҳрида 26 июнь куни содир этилган бўлиб, ҳайдовчи салонидаги йўловчининг хавфсизлигини таъминламагани ва йўл ҳаракати қоидаларининг 11-бандида (ҳаракатланишни бошлашдан олдин йўловчилар транспорт воситасида жойларини эгаллаганлигига ишонч ҳосил қилиши ва йўловчиларни ҳаракатланаётган вақтда автомобиль салонидан тана қисмларини (қўлдан ташқари) чиқариш тақиқлангани тўғрисида огоҳлантиришга мажбурлиги) кўрсатиб ўтилган талабларни бажармагани аниқланган.
Ҳайдовчига нисбатан Маъмурий жавобгарлик тўғрисидаги кодекснинг 128-5-моддасига асосан (транспорт воситалари ҳайдовчиларининг йўлнинг қарама-қарши ҳаракатланиш учун мўлжалланган томонига ёки бўлагига йўл ҳаракати қоидаларини бузган ҳолда чиқиши, худди шунингдек, авария ҳолати юзага келишига сабаб бўлган, яъни йўл ҳаракатининг бошқа қатнашчиларини тезликни, ҳаракат йўналишини кескин ўзгартиришга ёки ўз хавфсизлигини ёхуд бошқа фуқароларнинг хавфсизлигини таъминлаш учун ўзга чораларни кўришга мажбур қилувчи ҳуқуқбузарликни содир этиши) маъмурий баённома расмийлаштирилди.
Чирчиқ шаҳар ИИБ ЙҲХБ томонидан олиб борилган суриштирувлар жараёнида ҳайдовчи транспорт воситасидан тана қисмини чиқариб олган фуқарони танимаслигини айтиб ўтган.
Ҳозирда ушбу маъмурий ҳуқуқбузарлик содир этган фуқарони аниқлаш ишлари олиб борилмоқда.
Мавзуга доир:
- Жиззахда ҳаракатланаётган Nexia ойнасидан танасининг бир қисмини чиқариб олган аёл жаримага тортилди
- Жиззахда ҳаракатланаётган Lacetti люкига чиқиб олган қиз жаримага тортилди (видео)
- Ҳаракатланаётган Spark устига чиқиб олган йигит видеоси TikTok’га жойлаштирилди. Видео иштирокчилари жаримага тортилди
Изоҳ (0)