Жиззах вилояти Зомин туманида ҳаракатланаётган Nexia-3 автомобили ойнасидан танасининг бир қисмини чиқариб олган аёл жавобгарликка тортилди, деб хабар беради ИИВ ЙҲХББ ахборот хизмати.
Маълум қилинишича, дам олиш масканларига олиб борувчи автомобиль йўлларида ҳаракат вақтида йўловчиларнинг автотранспорт воситаси ойнасидан тана қисмларини чиқариб олиш ҳолатлари тез-тез учрамоқда. Бу каби ҳолатлар фуқаролар томонидан тасвирга олиниб, ижтимоий тармоқларда тарқалади.
Таъкидланишича, ана шундай видеолавҳалардан бири ўрганилиб, ҳаракат вақтида Nexia-3 русумли автомобилнинг ойнасидан тана қисмларини чиқариб олган фуқаро юзасидан суриштирув ишлари олиб борилган.
Қоидабузарларга нисбатан Маъмурий жавобгарлик тўғрисидаги кодекснинг 138-моддаси 4-қисми (транспорт воситаси ҳаракатланаётган вақтда йўловчи томонидан тана қисмларини (қўлдан ташқари) салондан чиқариш) тартибида баённома тузилган.
Аввалроқ ҳаракатланаётган автомобиль люкига ўтириб олиб, қоидабузарлик содир этган қиз Жиззах вилояти ИИБ томонидан жаримага тортилгани тўғрисида хабар берилганди.
Изоҳ (0)