Финляндия Ички ишлар вазирлиги мигрантларнинг ўз ватанларига ихтиёрий равишда қайтишини осонлаштириш бўйича янги низом ишлаб чиқди. Бошпана бериш рад этилганлар 30 кун ичида ихтиёрий равишда уйларига қайтсалар, уларга 5300 евро тўланади.
ИИВ матбуот хизмати хабарига кўра, тўловни олиш учун мигрантлар 30 кун ичида ариза топширишлари керак. Агар ариза кейинроқ топширилса, тўлов 2000 евро бўлади. Янги регламент 2024 йил 1 январдан кучга киради.
Ички ишлар вазирлигининг тушунтиришича, ушбу қарор билан ўз ватанига ихтиёрий равишда қайтишни истовчиларга ёрдам бериш тизими соддалаштирилган. Ҳужжатнинг аввалги таҳририда тўловлар миқдори мигрантнинг келиб чиқиш мамлакатига боғлиқ эди. Энди эса тўловлар миқдори ҳамма учун бир хил бўлади.
Аниқлик киритилишича, агар қочқинлар Европа Иттифоқининг бошқа давлатига ёки визага муҳтож бўлмаган давлатга кўчиб ўтадиган бўлишса, тўлов амалга оширилмайди.
“Ватанга қайтишда ихтиёрий ёрдам транспорт харажатлари ва реинтеграцияни молиявий қўллаб-қувватлашдан иборат бўлади”, — дея қўшимча қилди вазирлик.
2023 йилнинг январь—ноябрь ойларида Европа бўйлаб чегарани ноқонуний кесиб ўтишлар сони ўтган йилнинг шу даврига нисбатан 17 фоизга ошиб, 355 мингтага етди. Бу 2016 йилдан буён максимал кўрсаткичдир.
Мигрантлар оқими фонида 28 ноябрь куни Финляндия ҳукумати Россия билан чегарадаги барча ўтиш пунктлари ёпилганини эълон қилди. 14 декабрь куни иккита назорат-ўтказиш пункти фаолияти тикланган бўлса-да, бироқ улар ўша куниёқ яна ёпилган.
Изоҳ (0)