Словакия бош вазири Роберт Фицо “ИнфоВожна” нашрига берган интервьюсида Украинанинг НАТОга аъзо бўлишига қарши бўлишини, чунки бу учинчи жаҳон урушининг бошланишини англатишини айтди.
“Биз сайловлардан олдин айтган эдик, агар гап Украинанинг НАТОга аъзолиги ҳақида кетаётган бўлса, бу биз учун муаммо бўлади, мен буни Йенс Столтенберг билан бўлган учрашувда ҳам айтдим. Биз Украинанинг НАТОга аъзо бўлишига рози бўлмаймиз, чунки бу учинчи жаҳон урушининг бошланиши бўлади... Мен ишонаманки, бу ҳеч қачон содир бўлмайди. Словакия сиёсий саҳнасига таъсир ўтказиш имкониятим бор экан, мен бундай қарорга вето қўйиш ҳуқуқидан фойдаланаман”, — деди Фицо.
Шунингдек, у Украинанинг Европа Иттифоқига қўшилиши учун кўп йиллар кераклиги, ҳозир эса мамлакат бунга тайёр эмаслигини таъкидлади.
“Агар Украинани сиёсий жиҳатдан қўллаб-қувватлаш учун шундай сиёсий йўл тутиш керак бўлса, унда менда ҳеч қандай эътироз йўқ эди. Парламент сайловлари олдидан ҳам мен буни айтдим. Агар Европа Иттифоқи Украинани қабул қилмоқчи бўлса, бу муаммо эмас. Лекин Украина бунинг учун барча шартларни бажариши керак”, — деди Фицо.
14 декабрь куни бўлиб ўтган ЕИ саммитида Украина ва Молдовани Европа Иттифоқига бўлажак аъзолиги бўйича музокараларни бошлашга қарор қилди. Словакия бош вазири Роберт Фицо буни изоҳлар экан, Украина билан музокараларни бошлаш қарори фақат сиёсий йўл эканлигини, мамлакат Европа Иттифоқига қўшилишга тайёр эмаслигини айтганди.
Изоҳ (0)