Фаластиннинг ҲАМАС гуруҳи етакчиси Исмоил Ҳания Қоҳирага ташриф буюрди. Бу ҳақда Anadolu хабар берди.
Маълум қилинишича, у Миср расмийлари билан Ғазо секторидаги жангларда эҳтимолий янги паузани муҳокама қилиши кутилмоқда.
Қатарда яшовчи Ҳания одатда муваффақиятга эришиш мумкин бўлган келишувлардагина дипломатик жараёнларга оммавий равишда аралашади. Музокаралар Миср ва Қатар воситачилигида ҲАМАС ва Исроил ўртасида маҳбусларни алмашиш бўйича келишувнинг бошланиши бўлиши мумкин. Миср расмийлари ҲАМАС етакчисининг ташрифи юзасидан ҳозирча баёнот бергани йўқ.
Исмоил Ҳания охирги марта Мисрга ноябрь ойи бошида, урушда ягона сулҳ эълон қилинишидан олдин ташриф буюрганди.
Янги сулҳга тайёргарлик
17 декабрь куни Reuters ўз манбаларига таяниб, Исроил ва ҲАМАС Ғазо секторида ўт очишни тўхтатиш режимини тиклашга тайёрлигини маълум қилди. Янги оташкесим эълон қилиш учун ҲАМАС бир томонлама озод қилиш тартиби учун гаровга олинганларнинг рўйхатини талаб қилмоқда. Улар, шунингдек, Исроил армиясининг олдиндан келишилган чизиқларга чекинишни талаб қилмоқда, бироқ Reuters Исроил охирги талабга рози бўлмаганини ёзди.
Миср ва Қатар Исроил ва ҲАМАС ўртасидаги музокараларда воситачи сифатида қатнашиб, сулҳ бошланишидан олдин Ғазо сектори жанубида яна бир назорат-ўтказиш пункти – Керем Шалом очилишини талаб қилди. 17 декабрда ушбу назорат-ўтказиш пункти очилган, бироқ у орқали инсонпарварлик ёрдамларини ташиш ҳали бошланмаган.
Изоҳ (0)