Исроил ҲАМАСга гуруҳ томонидан гаровга олинганлар эвазига Ғазо секторидаги жанговар ҳаракатларни камида бир ҳафтага тўхтатишни таклиф қилди, деб хабар бермоқда Axios Исроилнинг икки расмийси ва вазиятдан хабардор бир манбага таяниб.
Келишув доирасида Исроил ҳукумати 40 га яқин одам, жумладан, аёллар, 60 ёшдан ошган эркаклар ва шошилинч тиббий ёрдамга муҳтожлар озод этилишини кутмоқда.
Бунинг эвазига Исроил ҳукумати биринчи сулҳ даврида озод қилинганлардан кўра оғирроқ жиноятларда айбланган фаластинлик маҳбусларни қамоқдан озод қилишга тайёр. Бундан ташқари, нашр манбаларининг қайд этишича, Исроил қамоқхоналарида озод этилиши мумкин бўлган ўнлаб “кекса ёки касал” фаластинликлар сақланмоқда.
Нашр суҳбатдошларига кўра, таклиф Варшавада Исроил разведка хизмати “Моссад” раҳбари Девид Барнеа, Марказий разведка бошқармаси директори Уилям Бернс ва Қатар бош вазири Муҳаммад бин Абдураҳмон иштирок этган учрашувдан сўнг Қатар воситачилари орқали ҲАМАСга етказилган.
Учрашувда Қатар бош вазири ҲАМАСнинг сулҳ бўйича позициясини билдирди, унга кўра Исроил гаровга олиш бўйича музокаралар бошланишидан олдин ҳужумларини тўхтатиши керак, дейилади Axios маълумотларида. Бунга жавобан Барнеа, агар ҲАМАС урушни тўхтатмоқчи бўлса, қуролини ташлаб, Ғазо секторидаги 7 октябрь ҳужуми учун жавобгар бўлган раҳбарларини Исроилга топшириши кераклигини айтган.
19 декабрь куни Исроил президенти Исаак Герцог гаровга олинганларни озод қилиш эвазига ҲАМАС билан янги сулҳ тузишга тайёрлигини айтди. Бир неча кун аввал Reuters агентлиги Миср хавфсизлик кучларидаги манбаларига таяниб, Исроил ва ҲАМАС музокараларга очиқ экани, бироқ можаро томонларида сулҳ шартлари бўйича келишмовчиликлар борлигини ёзганди.
Аввал Исроил ва ҲАМАС вақтинчалик сулҳ тузган эди. Ғазо секторида ўт очишни тўхтатиш келишуви 24 ноябрь куни кучга кирди. 27 ноябрда икки кунга, 30 ноябрда эса яна бир кунга узайтирилди. Келишув доирасида ҲАМАС 105 нафар гаровга олинганларни, жумладан, 20 дан ортиқ бошқа давлат фуқароларини озод қилди (улар алмашув рўйхатидан ташқари қўйиб юборилган). Бунинг эвазига Исроил ҳукумати 210 нафар фаластинликни қамоқдан озод қилди. 1 декабрь куни Ғазо секторида жанглар қайта бошланди.
ҲАМАС 7 октябрь кунги Исроилга ҳужуми чоғида жами 240 га яқин одамни гаровга олганди.
Изоҳ (0)