Туркияда ҲАМАС гуруҳи вакилларининг махфий учрашуви бўлиб ўтди. Унда гуруҳ сиёсий бюроси раиси ўринбосари Солиҳ ал-Арурий, гуруҳ собиқ раҳбари Холид Мешал ва бошқа бир қатор юқори мартабали вакиллар иштирок этди, деб хабар бермоқда Исроилнинг Кан радиостанцияси.
Учрашувда ҲАМАСнинг Исроил билан урушдаги кейинги қадамлари муҳокама қилинган.
Радиостанция қайд этишича, ҲАМАС етакчилари масофадан ўтказилган музокараларда айтилган гаплардан Исроил разведка хизматлари хабар топмаслиги учун шахсан учрашишга қарор қилган. Кан маълумотларига кўра, Туркиядаги учрашувда бошқа масалалар қатори Ғазо сектори ва Ливандаги жангчиларнинг фаолияти, шунингдек, гаровга олинганларни айирбошлаш бўйича янги келишув муҳокама қилинган.
Янги сулҳга тайёргарлик
17 декабрь куни Reuters ўз манбаларига таяниб, Исроил ва ҲАМАС Ғазо секторида ўт очишни тўхтатиш режимини тиклашга тайёрлигини маълум қилди. Янги оташкесим эълон қилиш учун ҲАМАС бир томонлама озод қилиш тартиби учун гаровга олинганларнинг рўйхатини талаб қилмоқда. Улар, шунингдек, Исроил армиясининг олдиндан келишилган чизиқларга чекинишни талаб қилмоқда, бироқ Reuters Исроил охирги талабга рози бўлмаганини ёзди.
Миср ва Қатар Исроил ва ҲАМАС ўртасидаги музокараларда воситачи сифатида қатнашиб, сулҳ бошланишидан олдин Ғазо сектори жанубида яна бир назорат-ўтказиш пункти – Керем Шалом очилишини талаб қилди. 17 декабрда ушбу назорат-ўтказиш пункти очилган, бироқ у орқали инсонпарварлик ёрдамларини ташиш ҳали бошланмаган.
Изоҳ (0)