Пентагон Қизил денгиздаги кемаларга ҳужумлар кучайиши муносабати билан Яман шимолида ҳукмронлик қилаётган “Ансор Аллоҳ” ҳаракатининг (ҳусийлар) ҳарбий объектларига зарба бериш имкониятини кўриб чиқмоқда. Бу ҳақда АҚШ президенти Жо Байден маъмурияти расмийларига таяниб, Semafor портали хабар берди.
Ҳусийлар аввалроқ Исроил билан боғлиқ ҳар қандай кемага ҳужум қилишлари ҳақида огоҳлантириб, бошқа давлатларни ўз экипажларини чақириб олишга ва денгизда уларга яқинлашмасликка чақирганди. Бир қатор юк ташиш компаниялари Қизил денгиз орқали ташишни тўхтатишга қарор қилган.
Пентагон 16 декабрь куни Қизил денгизда АҚШ эсминеци ҳусийлар назорати остидаги ҳудуддан учирилган 14 та дронни уриб туширганини таъкидлади.
“Пентагон Ямандаги ҳусийларнинг ҳарбий объектларига тўғридан-тўғри зарбалар бериш имкониятини муҳокама қилмоқда”, — дейилади хабарда.
АҚШ маъмурияти расмийлари “Теҳрондаги ҳусийлар ва уларнинг ҳомийлари глобал денгиз савдосини бузишга уринаётганидан” тобора хавотирда.
Шу билан бирга, портал суҳбатдошлари бундай қадам “Эрон ва унинг ишончли вакилларига қарши кенгроқ уруш” бошланишига олиб келиши мумкинлиги ҳақидаги қўрқувни инобатга олиб, зарбалар бериш имкониятини кўриб чиқишганини таъкидлади.
АҚШ миллий хавфсизлик бўйича маслаҳатчиси Жейк Салливан Эрон ҳусийлар томонидан юк ташиш таҳдидига барҳам бериш учун чора кўриши кераклигини айтди. Аввалроқ Эрон Ғарб давлатлари, хусусан, АҚШ ва Британиянинг Яманнинг “Ансор Аллоҳ” ҳаракати томонидан Қизил денгиздаги савдо кемаларига уюштирилган ҳужумларга алоқадорлиги ҳақидаги баёнотларини рад этганди.
Изоҳ (0)