Франция ҳарбий кемаси Яман ҳусийлари томонидан учирилган иккита дронни уриб туширди. Бу ҳақда Arab News хабар берди.
Маълум қилинишича, ҳодиса 9 декабрь, шанба куни кечки пайт Қизил денгизда содир бўлган. Languedok фрегати Яман ҳусийлари назоратидаги порт шаҳридан учирилган дронларни уриб туширган. Франция ҳарбий-денгиз кучлари “аниқланган иккита таҳдидни ушлаб туриш ва йўқ қилиш” амалга оширилганини билдирган.
Яман ҳусийлари Қизил ва Арабистон денгизи орқали Исроилга кетаётган ҳар қандай кемага ҳужум қилишларини эълон қилганди. 4 декабрь куни Қизил денгизда учта тижорат кемаси ва битта Америка эсминети Яман ҳусийлари ҳужумига учради.
Пентагон воқеага изоҳ берар экан, бундай ҳужумлар халқаро савдо ва денгиз хавфсизлигига тўғридан-тўғри таҳдид солаётганини таъкидлаб, ҳужумларда Эронни ҳам айблади.
“Ансор Аллоҳ” гуруҳи (ҳусийлар) 2015 йилдан буён Яманни амалда бошқариб келмоқда. Ҳусийлар Исроилга қарши урушда ҲАМАСни қўллаб-қувватловчи Эрон ва “Ҳизбуллоҳ” билан яқин алоқага эга эканига ишонилади.
Изоҳ (0)