Россия 4 сентябрга ўтар кечаси Измоил порти ҳудудидаги дронлар билан ҳужум қилди, бир нечта Shahed-136/131 дронлари Руминия ҳудудига қулаб тушди ва портлади. Бу ҳақда Украина Ташқи ишлар вазирлигининг расмий вакили Олег Николенко хабар берди.
Украина Давлат чегара хизмати маълумотларига кўра, бугун тунда Россиянинг Измоил порти ҳудудидаги йирик ҳужуми чоғида Shahed’лар Руминияга тушган.
Бу Россия ракета террори нафақат Украина хавфсизлигига, балки қўшни давлатлар, хусусан, НАТОга аъзо давлатлар хавфсизлигига ҳам катта таҳдид солаётганининг яна бир тасдиғидир, — деб ёзади Николенко.
Шу муносабат билан Украина қўшимча ракетага қарши ва ҳаво ҳужумига қарши мудофаа тизимлари ҳамда жанговар самолётлар етказиб бериш учун ҳамкор давлатларга мурожаат қилди.
“Ҳамкорларни Украинани қўшимча замонавий ракетага қарши ва ҳаво ҳужумига қарши мудофаа тизимлари ҳамда жанговар авиация билан таъминлашни тезлаштиришга чақирамиз, бу эса Украина, шунингдек, қўшни давлатлар инфратузилмасини ҳимоя қилишни кучайтиради”, — дейди Украина ТИВ вакили.
Руминия бунга қандай муносабат билдирди?
Руминия Мудофаа вазирлиги Россиянинг сўнгги дрон ҳужумлари мамлакатга тўғридан тўғри ҳарбий хавф туғдирмаслигини қайд этди.
Миллий мудофаа вазирлиги 3 сентябрдан 4 сентябрга ўтар кечаси содир бўлган, гўёки Руминия ҳудудига Россия дронлари қулагани ҳақидаги маълумотларни қатъиян рад этади, — дейилади хабарда.
Таъкидланишича, Руминия Мудофаа вазирлигининг масъул тузилмалари Россия дронларининг кеча тунда ҳам, шанба ва якшанба кунлари ҳам Дунай дарёсидаги Украина портлари яқинидаги инфратузилмага ҳужуми билан боғлиқ вазиятни реал вақт режимида кузатган.
“Ҳеч бир эпизодда Россия томонидан қўлланган зарба қуроллари Руминия миллий ҳудуди ёки ҳудудий сувларига тўғридан тўғри ҳарбий хавф туғдирмаган”, — дейилади муносабатда.
Изоҳ (0)