АҚШ Руминияда НАТО ҳаво полицияси вазифаларини бажарадиган самолётлардан ташқари жанговар самолётларни жойлаштиришни режалаштирмоқда. Бу ҳақда АҚШнинг Руминиядаги элчиси Кетлин Кавалек мамлакат миллий мудофаа вазири Анхел Тулвар билан учрашувда маълум қилди.
“Элчи Кавалек Қўшма Штатлар Руминияга ўз миллий ҳудудини янада самаралироқ ҳимоя қилиш учун ёрдам кўрсатишда давом этишини истамоқда. Бу Руминияда яқин келажакда НАТО ҳаво полицияси миссияларига қўшимча равишда АҚШ Ҳарбий-ҳаво кучларининг жанговар самолётларини жойлаштириш орқали амалга оширилади”, — дейилади АҚШ департаменти баёнотида.
НАТО ҳаво полицияси миссияси 2004 йилда ташкил этилган. Бу ташкилотга аъзо мамлакатлар ҳаво ҳудудининг ҳар қандай бузилишларига тезкорлик билан жавоб беришга тайёр бўлган қирувчиларнинг доимий назоратини англатади.
Кавалек, шунингдек, АҚШ расмийлари Руминия ва НАТОнинг шарқий қанотидаги умумий иттифоқ ҳудудига қарши ҳар қандай тажовузни қайтариш ва унинг олдини олиш имкониятларини кучайтириш тарафдори эканини таъкидлади.
Руминия мудофаа вазири, ўз навбатида, сўнгги воқеалар фонида кўрсатаётган ёрдами учун АҚШга миннатдорчилик билдирди.
6 сентябрь куни Руминиянинг Украина билан чегарадош Тулча округида Россия томонидан қўлланилган дроннинг бир неча қисмлари топилди. НАТО бош котиби Йенс Столтенберг содир бўлган воқеа “Россия томонидан қасддан қилинган ҳужум” эканлигини тасдиқламаслигини айтди.
Изоҳ (0)