Россия ва Молдова ўртасида дўстона муносабатлар ўрнатиб бўлмайди, чунки Москва Кишинёв манфаатларини ҳурмат қилмайди, деди Молдова президенти Майя Санду.
“Шуни эслатишни истардимки, бизни ҳурмат қилмайдиган томон — Россия бизга шантаж қилади, ҳар икки кунда таҳдид қилади, Россия ўз қўшинларини бизнинг хоҳишимизга зид равишда мамлакатимиз ҳудудида ушлаб турибди, шубҳасиз, дўстона муносабатлар ҳақида гапира олмаймиз”, — деди Санду Vоcеа Basarabiei телеканалига берган интервьюсида.
Унинг қўшимча қилишича, Россия “Молдова Республикаси ва унинг фуқароларига муносабатини ўзгартирсагина” нормал муносабатлар ўрнатилиши мумкин.
Сандунинг таъкидлашича, Молдованинг Россиядан газ таъминотига қарамлиги камайган, шунинг учун Россия “газ сотишда энди шантаж қила олмайди” ва “кўнглига келган шартларни қўя олмайди”.
Маълумот учун, 1990 йилда Днестрбўйи Молдавия республикаси Молдовадан ажралиб чиққанини эълон қилган, унинг мустақиллигини ҳеч ким тан олмаган. Минтақада жанглар 1992 йилда можарони ҳал қилиш бўйича келишув имзоланиши билан якунланган. Ўшандан бери ДМРда Россия тинчликпарвар контингенти жойлашиб турибди.
Молдова ҳукумати бир неча бор Россияни қўшинларини олиб чиқишга чақирган. ДМРдагилар эса аксинча, тинчликпарвар кучлар минтақада қолиши шарт, деб ҳисоблайди. Кремль Молдова ҳукуматига тинчликпарвар кучлар ҳақидаги баёнотларда эҳтиёт бўлишни маслаҳат бериб, Москва ДМРда ўз вазифаларини бажаришда давом этаётганини таъкидлаган.
Изоҳ (0)