Rossiya va Moldova o‘rtasida do‘stona munosabatlar o‘rnatib bo‘lmaydi, chunki Moskva Kishinyov manfaatlarini hurmat qilmaydi, dedi Moldova prezidenti Mayya Sandu.
“Shuni eslatishni istardimki, bizni hurmat qilmaydigan tomon — Rossiya bizga shantaj qiladi, har ikki kunda tahdid qiladi, Rossiya o‘z qo‘shinlarini bizning xohishimizga zid ravishda mamlakatimiz hududida ushlab turibdi, shubhasiz, do‘stona munosabatlar haqida gapira olmaymiz”, — dedi Sandu Vocea Basarabiei telekanaliga bergan intervyusida.
Uning qo‘shimcha qilishicha, Rossiya “Moldova Respublikasi va uning fuqarolariga munosabatini o‘zgartirsagina” normal munosabatlar o‘rnatilishi mumkin.
Sanduning ta’kidlashicha, Moldovaning Rossiyadan gaz ta’minotiga qaramligi kamaygan, shuning uchun Rossiya “gaz sotishda endi shantaj qila olmaydi” va “ko‘ngliga kelgan shartlarni qo‘ya olmaydi”.
Ma’lumot uchun, 1990-yilda Dnestrbo‘yi Moldaviya respublikasi Moldovadan ajralib chiqqanini e’lon qilgan, uning mustaqilligini hech kim tan olmagan. Mintaqada janglar 1992-yilda mojaroni hal qilish bo‘yicha kelishuv imzolanishi bilan yakunlangan. O‘shandan beri DMRda Rossiya tinchlikparvar kontingenti joylashib turibdi.
Moldova hukumati bir necha bor Rossiyani qo‘shinlarini olib chiqishga chaqirgan. DMRdagilar esa aksincha, tinchlikparvar kuchlar mintaqada qolishi shart, deb hisoblaydi. Kreml Moldova hukumatiga tinchlikparvar kuchlar haqidagi bayonotlarda ehtiyot bo‘lishni maslahat berib, Moskva DMRda o‘z vazifalarini bajarishda davom etayotganini ta’kidlagan.
Izoh (0)