Молдова бош вазири ўрибосари, иқтисодий тараққиёт ва рақамлаштириш вазири Думитру Алаиба мамлакат Украинадан кейин урушдан энг кўп жабр чеккан мамлакат бўлганини таъкидлади.
Самарқанд шаҳрида ўтказилаётган ЕТТБ йиғилиши доирасидаги сессияда сўзга чиққан амалдорнинг айтишича, қўшни Украинадаги уруш Молдовада ўтган йили жиддий қийинчиликларга сабаб бўлган.
“Биз, Молдова ва бутун Европа учун курашаётган ва уни ҳимоя қилаётган жасур украиналиклардан кейин бу урушнинг энг катта жабрдийдасимиз. Уруш мамлакат учун кўплаб иқтисодий муаммолар ва оқибатларга сабаб бўлди.
Чунки йил жуда яхши рақамлар билан бошланган эди. 24 февралдан кейин эса биз ҳаммамиз янги реалликда уйғондик ва бу янги ҳақиқат Молдованинг ташқи дунё билан савдосига ҳам боғлиқ бўлди”, — деган Молдова бош вазири ўринбосари.
Думитру Алаибанинг таъкидлашича, Молдова учун асосий савдо марказларидан бири Одесса порти бўлган. Бундан ташқари, мамлакат газ билан боғлиқ муаммоларга учраган.
“Биз бу қишда газ билан боғлиқ синовларни ҳам бошдан ўтказдик. Биринчи марта ъГазпромъдан газ сотиб олмадик. Бунда ЕТТБнинг ҳам ҳиссаси бор. Мамлакат бу қишда биринчи марта газ омборларини қурди. Жамиятимиз учун Россия газисиз омон қолиш каби тасаввур қилиб бўлмайдиган нарсалар содир бўлган бўлса ҳам, биз бунинг имкони борлигини кўрдик”, — деган у.
Изоҳ (0)