Аргентинанинг янги президенти Хавьер Милей вазирлар маҳкамасида қасамёд қилди. Бу ҳақда “ТАСС” хабар берди.
Маросимнинг расмий трансляцияси бўлмади, журналистларнинг ҳам иштирок этишига рухсат берилмаган. Маросим олдидан вазирликлар сони 19 тадан 9 тага қисқартирилди ва бу президентнинг биринчи фармони бўлди.
Милей ҳукумат раҳбари сифатида Николас Поссени танлади. Аввал давлат хизматида ишламаган Диана Мондино ташқи ишлар вазири бўлди. Иқтисодиёт вазирлигини собиқ президент Маурисио Макри даврида молия вазири ва Марказий банк раиси лавозимларида ишлаган Луис Капуто бошқаради.
Президентликка собиқ номзод Патрисия Буллрич хавфсизлик котиби бўлди. У аллақачон бу лавозимни Макри ҳукуматида эгаллаганди. Таълим, ижтимоий ривожланиш ва меҳнат вазирликлари ўрнига Сандра Петтовелё бошчилигидаги Инсон капитали вазирлиги ташкил этилди. Мариано Кунео Либарона адлия вазири, Гилермо Ферреро инфратузилма вазири, Марио Руссо соғлиқни сақлаш вазири бўлди. Ички ишлар вазирлигини Гилермо Франкос бошқаради.
Янги давлат раҳбарининг синглиси Карина Милей ҳам президент девони бош котиби сифатида қасамёд қилди. 2018 йилда Аргентинада қариндошларини давлат лавозимларига тайинлашни тақиқловчи фармон чиқарилганига қарамай, у бу лавозимни эгаллади.
Илгари Аргентина ҳукумати таркибида транспорт, жамоат ишлари, фан, уй-жой қурилиши, маданият, атроф-муҳитни муҳофаза қилиш, туризм, чорвачилик ва қишлоқ хўжалиги, аёллар ишлари вазирликлари ҳам мавжуд эди.
Изоҳ (0)