Буюк Британия Норвегия билан денгизда Украинани қўллаб-қувватлаш бўйича янги коалицияга раҳбарлик қилишини эълон қилди. Буюк Британия мудофаа вазири Грант Шаппс Киевга Қироллик денгиз флотининг иккита кемаси — Sandown синфидаги мина излаш кемалари топширилишни айтди.
Янги коалиция Украинага узоқ муддатли ёрдам, жумладан, Қора денгизда хавфсизликни мустаҳкамлаш учун тайёргарлик, жиҳозлар ва инфратузилмани тақдим этади, — дейилади Буюк Британия Мудофаа вазирлиги баёнотида.
Унга кўра, узоқ муддат давомида коалиция Украинага денгиз кучларини НАТОга мослаштиришда ёрдам беради.
Таъкидланишича, коалиция Украина билан Қора денгизга тезкор жойлашишни ўргатиш ва денгиз пиёдаларининг қирғоқбўйи ҳудудларини ҳимоя қилиш учун жанговар тайёргарлигини ошириш бўйича ҳамкорлик қилади. Тегишли келишувга Украина мудофааси бўйича алоқа гуруҳининг ноябрдаги йиғилишида эришилган.
Киев мина излаш кемаларини Буюк Британиянинг экспорт-кредит агентлиги кўмагида сотиб олади. Трансфер 11 декабрь куни Грант Шаппс томонидан расман эълон қилинади.
Изоҳ (0)