Ноябрь ойида Аргентинада бўлиб ўтган президентлик сайловларида ғалаба қозонган Хавьер Милей “шок” ислоҳотлар пакетини тақдим этмоқчи, деб хабар берди Bloomberg Аргентинанинг La Nacion газетаси нашрига таяниб.
Нашр манбалари ҳужжат “янги ижтимоий шартнома” бўлишини айтди. У нафақат янги маъмурият давридаги ҳукумат тузилмасини белгиловчи “вазирлик қонуни” стандарти, балки сиёсий ва иқтисодий характердаги бошқа чораларни ҳам ўз ичига олади.
Улар орасида қуйидагилар бор:
- вазирликлар сонини ҳозирги 18 тадан саккиз ёки тўққизтага қисқартириш, шунингдек, улар таркибидаги қуйи тузилмаларни тугатиш;
- тоғ-кон ва нефть соҳаларида иқтисодий қонунчилик регуляциясини бекор қилиш (бу инвестицияларни рағбатлантириш учун зарур, деди La Nacion манбаси);
- солиқ тизимини соддалаштириш;
- меҳнат соҳасидаги ўзгаришлар (масалан, иш берувчилар учун жарималар тизимини камайтириш ва компенсацияни ишсизлик фонди билан алмаштириш);
- давлат корхоналарини хусусийлаштириш ёки уларнинг улушларини ходимларга бериш;
- партияларни молиялаштириш ва праймеризларга таъсир қиладиган “сиёсий ислоҳотлар”.
Мухолифатчи Милей президентлик сайловларининг иккинчи босқичида ғалаба қозонганди. У 56 фоиз, унинг рақиби, ўша пайтдаги ҳукмрон коалиция номзоди ва иқтисодиёт вазири Серҳио Масса 44 фоиз овоз тўплади. Милей 10 декабрда президент лавозимига киришади.
Сиёсатчи ўзини “анархо-капиталист” деб таърифлайди: сайловолди кампанияси давомида у сўнгги ўн йил ичида олтинчи турғунлик арафасида турган ва 143 фоиз инфляциядан азият чекаётган Аргентина иқтисодиётини яхшилаш бўйича радикал ваъдалар берди. Хусусан, у мамлакат Марказий банкини тугатиш ва миллий валюта – песодан воз кечиб, уни Америка долларига алмаштиришни таклиф қилди.
Изоҳ (0)