Аргентинада ўнг қанот “Озодлик келяпти” альянси бир қисми бўлган Либертарлар партиясига раҳбарлик қилувчи Хавьер Милей президентлик сайловларида ғалаба қозонди, деб хабар беради La Nicon.
Бюллетенларнинг 98,01 фоизи ҳисоб-китобига кўра, Милей 55,75 фоизга яқин овоз тўплаган. Милейнинг сайловлардаги ғалабаси билан унинг рақиби, “Ватан учун иттифоқ” ҳукмрон коалициясидан номзод бўлган Аргентина иқтисодиёт вазири Серхио Масса ҳамда бир қатор Лотин Америкаси давлатлари етакчилари табриклади. Масса сайлов давомида 44,24 фоиз овоз тўплади.
“Бу аргентиналиклар танлаган президент”, — дейди Масса. Амалдаги давлат раҳбари Альберто Фернандес, шунингдек, мухолиф сиёсатчини ғалаба билан табриклаб, тез орада ҳокимиятни топшириш жараёнларини ташкиллаштиришга умид билдирган.
Хавьер Милей мамлакатнинг BRICS гуруҳига аъзолигини қўллаб-қувватламайди, давлатнинг фуқаролар ҳаётига минимал аралашувини ёқлайди, Марказий банкни тугатмоқчи ва миллий валутани долларга алмаштиришни таклиф қиляпти. Сайловолди кампанияси давомида у Россия, Хитой ва Бразилиянинг “коммунистик” ҳукуматлари билан алоқаларни узиш режасини ҳам эълон қилган.
Иқтисодий муаммоларни ҳал қилиш учун “бензоарра” ўзига тимсол сифатида танлаган номзод бюджет харажатларини жиддий қисқартирмоқчи.
Октябрь охирларида Аргентинада президентлик сайловларидан кейин санаб чиқилган бюллетенларнинг 76 фоизи натижаларига кўра, ҳукмрон Аргентина коалициясидан номзод, иқтисодиёт вазири Серхио Масса 35,8 фоиз овоз олганди; унга энг яқин рақиб, депутат Хавьер Милей эса 30,5 фоиз.
Изоҳ (0)