500 чавандоз, 10 минг томошабин ва соврин учун қўйилган туялар. Намангандаги Ҳосил байрамидан фоторепортаж

Наманганда қишлоқ хўжалиги ходимлари кунига бағишлаб ўтказилган ҳосил байрами доирасида улоқ-кўпкари беллашувлари бўлиб ўтди. Бу ҳақда “Дарё” мухбири Азизбек Абдувалиев хабар бермоқда.

Давлатобод туманидаги отчопарда 10 мингга яқин томошабин йиғилди. Улар орасида турли авлод вакилларини учратиш мумкин эди.

Беллашувларда қўшни Андижон ва Фарғона, шунингдек, Тошкент, Жиззах, Сирдарё, Самарқанд, Қашқадарё вилоятларидан ҳамда қўшни Қозоғистон, Тожикистон ҳамда Қирғизистондан келган 500 нафарга яқин моҳир чавандоз иштирок этди.

Ушбу байрам тадбири иштирокчилари санъаткорлар чиқишлари, энг сара ошпазлар томонидан тайёрланган миллий таомлардан баҳраманд бўлди. Арзонлаштирилган қишлоқ хўжалиги маҳсулотлари ярмаркасида эса 50 турдан ортиқ озиқ-овқат маҳсулотлари ва полиз экинлари аҳолига мақбул нархларда етказиб берилди.

Улоқ-кўпкари якунида унинг ғолиб ва совриндорлари ташкилотчилар томонидан қимматбаҳо совғалар билан тақдирланди.