Ашхободда бўлиб ўтган иқтисодий ҳамкорлик бўйича ҳукуматлараро Туркманистон-Туркия комиссияси йиғилишида туркман табиий газини Туркия бозорига етказиб бериш имкониятлари муҳокама қилинди.
“Туркманистондан Туркияга Эрон орқали газ етказиб бериш бўйича лойиҳанинг долзарблиги таъкидланди”, — дея хабар беради маҳаллий “Олтин Аср” телеканали. Туркия делегациясига вице-президент Жевдет Йилмаз бошчилик қилди.
Йиғилишда таъкидланганидек, сўнгги йилларда яратилган миллий газ транспорти инфратузилмаси Туркманистонга ўз табиий газини катта ҳажмларда ғарбга экспорт қилиш учун кенг имкониятлар очмоқда. Томонлар яқин келажакда тегишли идора ва компаниялар раҳбарлари даражасида музокараларни бошлашга келишиб олди.
Мутахассисларнинг “Дарё”га маълум қилишича, экспорт учун хом ашё манбаларидан бири захиралари 27,4 триллион кубометрни ташкил этувчи энг йирик газ кони “Галкиниш” ҳисобланади. Туркманистон 2022 йил бошидан бери Эрон орқали Озарбайжонга газни уч томонлама очиқ келишув асосида етказиб бермоқда.
Бу операциялар Эроннинг миллий газ ресурсларидан узоқда жойлашган Разавий, Шимолий ва Жанубий Хуросон, Гулистон ва Семнан каби вилоятларига табиий газ етказиб беришга ёрдам беради. Эрон туркман газини ўз чегарасида олади ва ўз конларидан Озарбайжонга худди шундай ҳажмда газ етказиб беради.
Изоҳ (0)