Туркманистон 2023 йил 30 ноябрдан —12 декабргача Дубай шаҳрида бўлиб ўтадиган БМТнинг иқлим ўзгариши бўйича конференцияси (COP-28) чоғида мамлакатнинг Метан бўйича глобал мажбуриятга қўшилиши ҳақида эълон қилишни режалаштирмоқда.
Ушбу масала ҳукумат йиғилишида кўтарилди, деб хабар бермоқда маҳаллий “Олтин Асир” телеканали. Бугунги кунга қадар 150 га яқин давлат ушбу ҳужжатга қўшилган.
Туркманистонда 2021 йилдан буён тегишли ишлар амалга оширилмоқда: метан чиқиндиларини камайтириш бўйича юқори даражадаги тармоқлараро комиссия тузилди ва бу борада халқаро ҳамкорликни ривожлантириш бўйича “Йўл харитаси” тасдиқланди. Метан иқлимга CO2 дан 80 баравар кучли таҳдид солади.
Туркманистон Хитой, Россия, Озарбайжон ва Ўзбекистон томонидан харид қилинадиган табиий газнинг минтақадаги асосий етказиб берувчиларидан бири ҳисобланади.
Мутахассисларнинг “Дарё”га маълум қилишича, нефть ва газнинг атмосферага сизиб чиқиши ҳолатлари асосан қувурларнинг эскириши, шунингдек, нефть билан бирга ҳосил бўладиган метан газининг атмосферага тарқалиши билан боғлиқ.
Маҳаллий нефть-газ концернларига кўра, Туркманистонда қўшма нефть газидан фойдаланиш ҳажмини ошириш, қазиб олиш, ташиш, сақлаш ва қайта ишлаш жараёнида табиий газнинг йўқотилишини камайтириш чоралари кўрилмоқда.
Изоҳ (0)