2017—2022 йилларда Ўзбекистонда қулай инвестицион муҳитни яратиш бўйича амалга оширилган чора тадбирлар ва унинг натижаси ўрганиб чиқилди. Бу ҳақда Прогнозлаштириш ва макроиқтисодий тадқиқотлар институти хабар берди.
Сўнгги йилларда мамлакатда инвестицион муҳитни яхшилаш ва тадбиркорликни қўллаб-қувватлаш мақсадида 12 дан ортиқ Қонун, 60 дан ортиқ Фармон ва қарор қабул қилинди.
Тадбиркорларнинг мурожаатларини кўриб чиқиш учун Президент ҳузурида “Бизнес Омбудсман” институти, Бош вазир қабулхоналари ҳамда инвесторлар учун ягона марказ ташкил этилди.
2021 йилда мамлакат тарихида илк бор қишлоқ хўжалигига мўлжалланмаган ерларни хусусийлаштириш жараёни бошланди.
Агар 2016 йилда фуқаролари Ўзбекистонга визасиз кириб чиқа оладиган мамлакатлар сони 9 тани ташкил қилган бўлса, виза тизими ислоҳ қилиниши натижасида бундай мамлакатлар сони 2022 йилда 90 тадан ортди. Шунингдек, инвесторлар ва уларнинг оила аъзолари учун алоҳида “инвестицион виза” тизими жорий қилинди.
Амалга оширилган ислоҳотлар ўз натижасини берди. Масалан, 2017—2022 йилларда Ўзбекистон халқаро Иқтисодий эркинлик индекси умумий рейтингида ўз ўрнини 31 поғонага яхшилаб, 148-ўриндан 117- ўринга кўтарилди.
2017 йилда иқтисодиётга киритилган жами инвестициялар ҳажми 14 миллиард долларни ташкил этган бўлса, 2022 йилда бу кўрсаткич 1,7 баробар ошиб, 24 миллиард долларга етди.
Бугунги кунда жаҳоннинг 50 дан ортиқ мамлакати Ўзбекистонга барқарор тарзда инвестиция киритмоқда. Улар иқтисодиётимизнинг асосан металлургия, энергетика, кимё саноати, электротехника, машинасозлик, енгил саноат тармоқларида фаолият юритмоқда.
Инвестицион муҳитни яхшилашга қаратилган ислоҳотлар иқтисодиётнинг ривожланиши ва инсонларнинг турмуш даражаси яхшиланишига хизмат қилади.
Изоҳ (0)