Россия “Вагнер” таркибида Украинага қарши урушда қатнашган ўзбекистонлик 53 яшар Александр Бабковга вақтинчалик бошпана берди. Бу ҳақда “Коммерсант” хабар берди.
Хабарга кўра, Бабковнинг вақтинчалик бошпана сўраб Свердловск вилоятига берган аризаси қабул қилинган. Аввалроқ жангчи Ўзбекистонга депортация қилиниши ва урушда қатнашгани учун 10 йилгача озодликдан маҳрум этилиши мумкинлиги маълум бўлганди.
“Унинг ҳуқуқий ҳолатини ҳал қилиш бўйича биринчи қадам қўйилди, кейинги ҳаракатлар алгоритми белгиланди. Менинг ҳамкасбларим ҳамма нарсани имкон қадар тезроқ тартибга солишга ҳаракат қилади. Александр бунга ишонч ҳосил қилиши мумкин”, — деди Россия Ички ишлар вазирлиги расмий вакили.
53 ёшли ўзбекистонлик “Вагнер” таркибида кўнгилли сифатида урушда бўлган. Хизмат ва жанговар топшириқларни бажаргани учун Александр Бабков “Жасорат учун” медали ва “Вагнер”нинг ички мукофотлари билан тақдирланган, масалан, Бахмутни (Артемовск) қўлга киритгани учун. У Россия фуқаролигига эга эмаслиги сабабли “ҳарбий фахрий” мақомини олмаган ва унинг вақтинча Россияда бўлиш муддати 2024 йил январь ойида тугайди.
Бабковнинг ўзи 2023 йил июль ойида урушда бўлганида Россия фуқаролигини олиш учун “Вагнер” адвокатлари орқали ҳужжатларни тақдим этган. Жангчи ҳарбий уруш зонасидан қайтиб келганида, у бириктирилган Краснодар ўлкасидаги ҳарбий база ёпилгани ва “Вагнер” кураторлари қўнғироқларга жавоб беришни тўхтатгани маълум бўлган.
2023 йил май ойида Россия президенти Владимир Путин урушда Россия қуролли кучларида хизмат қилиш учун йиллик шартнома тузган хорижликлар учун Россия фуқаролигини соддалаштирилган тарзда олиш тўғрисидаги фармонни имзолади.
Изоҳ (0)