Тошкентга English-Speaking Nation: English Summer Excellence Training (ESN: ESET) дастури доирасида 40 нафар америкалик инглиз тили ўқитувчиси Ўзбекистонга келди, деб хабар бермоқда ЎзА.
Ушбу экспертлар Ўзбекистондаги умумтаълим мактабларининг 520 нафар инглиз тили ўқитувчиси учун 120 соатлик ўқув машғулоти ўтказмоқда. 16 кунлик мазкур тренинг ўқитувчиларга инглиз тилида сўзлашиш, ёзиш, тинглаш ва ўқитиш кўникмасини оширишга кўмаклашади.
19 июндан иш бошлаган америкалик мутахассислар 8 июлга қадар Нукус, Навоий, Зарафшон, Шаҳрисабз, Денов, Жиззах, Гулистон, Ангрен, Қўқон ва Фарғона шаҳарларидаги ўрта мактаб ўқитувчилари билан амалий машғулот, тренинглар кундалик фаолиятда инглиз тилидан фойдаланиш, шунингдек, синфда дарс бериш ва ўқувчи билан мулоқот қилишда ўзаро ишончни мустаҳкамлашга қаратилган. Хорижлик экспертлар 30 нафар маҳаллий ўқитувчи билан биргаликда ўқувчиларга ҳам дарс беради.
Умумий инглиз тили ва синфда инглиз тили бўйича амалиётдан ташқари, ESN: ESET дастури ўқитувчиларга инглиз тилида таълим бериш ва фақат инглиз тилида олиб бориладиган ихчамлаштирилган микро-ўқитиш сессиясида якуний тақдимот ўтказишда яқиндан ёрдам беради.
The English-speaking Nation: Summer Excellence Training (ESN: ESET) дастури Ўзбекистондаги инглиз тили ўқитувчиларининг синфда инглиз тили компетенсияси ва дарс ўтишни кучайтиришга қаратилган умуммиллий ташаббуси саналган English-Speaking Nation: Secondary Teacher Training Program (ESN: SТТ) дастурининг таркибий қисмидир. Мазкур лойиҳа уч йил давомида Ўзбекистондаги 15 000 нафар инглиз тили ўқитувчисини қамраб олиши кўзда тутилган.
English-Speaking Nation АҚШнинг Ўзбекистондаги элчихонаси ҳамда Мактабгача ва мактаб таълими вазирлиги ўртасида йўлга қўйилган, таълим соҳасидаги ислоҳотни қўллаб-қувватловчи ҳамкорлик дастуридир. Халқаро таълим бўйича Америка кенгаши нодавлат нотижорат ташкилоти лойиҳани амалга оширишда шерик ҳисобланади.
Изоҳ (0)