Сомали президентининг ўғли Истанбулда курерни уриб юборди. Жабрланувчи вафот этди (видео)

Сомали президентининг ўғли Муҳаммад Ҳасан Маҳмуд Истанбулда курерни уриб юборди. Жабрланувчи салкам бир ҳафта ўтиб, касалхонада вафот этди. 

ОАВ маълумотларига кўра, воқеа 30 ноябрь куни Истанбул марказидаги Кеннеди шоссесида содир бўлган. Мототциклда бўлган 38 ёшли курер Юнус Гечер туннелдан чиқишда тезликни пасайтира бошлаган, у йўл четида тўхташни режалаштирган. 

Шу пайт Сомали президенти ўғли бошқарувидаги автомобиль мототциклга бориб урилган. Зарбадан кейин Гечер йўл четига бориб тушган. Шифокорларнинг уринишларига қарамай жабрланувчи касалхонада вафот этган. Гечернинг икки фарзанди бор, улардан бири ногирон. Курернинг дўстлари кузатув камералари ёзувларига асосланиб автоҳалокат вақтида Маҳмуднинг машинаси тормозлашга уринмаганини маълум қилди. Улар Маҳмудни Гечер ўлимида айбдор сифатида ҳибсга олишни талаб қилмоқда.

Муҳаммад Ҳасан Маҳмуд полиция томонидан сўроқ қилингач қўйиб юборилган, бироқ унга мамлакатни тарк этиш ҳуқуқи вақтинча чекланган.